Ֆուտզալի Հայաստանի հավաքականը պարտվեց Ֆինլանդիային

Այսօր Երևանում կայացավ ՖԻՖԱ Ֆուտզալի Աշխարհի 2024 թ. առաջնության էլիտ ռաունդի Հայաստան - Ֆինլանդիա հանդիպումը:

Հանդիպման 7-րդ րոպեին մեր թիմի խաղացող Ձանոտոն բացեց հաշիվը, սակայն հյուրերը դեռևս առաջին խաղակեսում երկու գոլ խփեցին և առաջ անցան հաշվի մեջ: Երկրորդ կեսի սկզբում Պարադինսկին վերականգնեց հավասարությունը, սակայն ֆինները վերջին րոպեին գրավեցին մեր թիմի դարպասը և հաղթանակ կորզեցին 3:2 հաշվով:

Հայաստանի հավաքականը կրեց երկրորդ անընդմեջ պարտությունը և նահանջեց վերջին տեղ, իսկ Ֆինլանդիան տարավ առաջին հաղթանակը և բարձրացավ 3-րդ հորիզոնական: Աղյուսակը գլխավորում են Պորտուգալիայի և Վրաստանի հավաքականները, որոնք հաղթանակ են տարել առաջին տուրում, և այսօր հանդիպելու են իրար հետ:

Ֆուտզալի Հայաստանի հավաքականը հաջորդ հանդիպումը կանցկացնի հոկտեմբերի 6-ին: Այդ օրը մեր թիմը կընդունի Պորտուգալիային: