Բացել լրահոսը Փակել լրահոսը
A A
Տեսանյութեր

Ծանոթը զենք է պարել եւ հափշտակել 7000 դրամ․ ոստիկանները ժամերի ընթացքում բացահայտեցին ավազակությունը (տեսանյութ)

Մարտի 22-ի ուշ երեկոյան ոստիկանության Արաբկիրի բաժնում հաղորդում տվեց մի երիտասարդ. ժամը 20.30-ի սահմաններում Կոմիտասի պողոտայում ծանոթն ու նրա ընկերները զենք են պահել իր վրա և հափշտակել փաստաթղթերը, բջջային հեռախոսը, լիցքավորման մարտկոցն ու յոթ հազար դրամ:

Արաբկիրի քննչական բաժնում նախաձեռնվեց քրեական վարույթ` ավազակության հատկանիշներով:
Բաժնի քրեական հետախույզներն անցան գործի, արագ պարզեցին ծանոթի ինքնությունը: Արդեն ժամը 21.50-ի սահմաններում 22-ամյա երիտասարդը հայտնաբերվեց Բյուրեղավանում՝ իր բնակության վայրի մոտ, ձերբակալվեց և տեղափոխվեց ոստիկանության Արաբկիրի բաժին: Անձնական խուզարկությամբ նրա մոտ հայտնաբերվեցին բջջային երկու հեռախոս, որոնցից մեկը տուժածից հափշտակածն էր, և կռփազենք: Քննչական բաժին ներկայացվելուց հետո նա տվեց խոստովանական ցուցմունք:

Հետագա միջոցառումների արդյունքում քրեական հետախույզները պարզեցին նաև, թե ովքեր են եղել 22-ամյա երիտասարդի հետ: Արդեն առավոտյան նույն տարիքի, նույն քաղաքի և նույն փողոցի բնակիչ երկու երիտասարդ ևս ձերբակալվեցին ու տեղափոխվեցին ոստիկանության բաժին: Նրանցից մեկի խուզարկությամբ հայտնաբերվեց հանցագործության գործիք ատրճանակը: Նրանք նույնպես ներկայացվել են նախաքննական մարմին, հանգամանքները պարզվում են:

`

 

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: