Մարիամ Զուրաբյանի «ազատության վանդակները» (տեսանյութ)
Աջակցիր «Ա1+»-ինՎանդակներ ու ցանցաձև նյութեր, որ խորհրդանշում են ազատության խոչընդոտող սահմանափակումներն ու կյանքի միապաղաղությունը, սոցիալական ցանցերից մեր ունեցած կախվածությունն ու ազատության պատրանքը։ Հիշեցնում են արևի ու լույսի գոյության մասին, բայց և ընդունում այսօրվա անորոշ ու մշուշոտ ապագան ու անորոշության մեջ ազատության ձգտումը։
LATITUDE ART SPACE մշակութային կենտրոնում բացվել է նկարիչ, դիզայներ Մարիամ Զուրաբյանի «Ցանցապատ արև» խորագիրը կրող ցուցահանդեսը։ Ներկայացված են «Ազատության վանդակներ» հավաքածուի 16 նկարները։
«Ցանցապատ արևը», Մարիամի բնորոշմամբ, բնութագրում է մարդու էներգիան, որը ցանցապատված է վիրտուալ աշխարհով։
Մարիամն, իր իսկ խոսքով, սիրում է նկարել ազատ ոճով։ Ոգեշնչման աղբյուր կարող է հանդիսանալ յուրաքանչյուր մի բան։ Համարձակ է ու կանոնները չեն սահմանափակում միտքը։ Միակ կանոնն ու չափանիշը զգացածի արտացոլումն է կտավի վրա։ Վստահ է, որ միայն այսպես է հնարավոր ստեղծել նոր մի բան արվեստում։
«Ցանցապատ արևը» վիրտու–ռեալ ցուցահանդես–վաճառքի առաջին փորձն է Հայաստանում։
«Աշխարհում արդեն մեծ տարածում են գտել նկարների վիրտուալ ցուցադրությունները՝ ստատիկ կամ անիմացիոն։ Սա հնարավորություն է նկարչի համար օգտվել արդի տեխնոլոգիական հնարավորություններից, ես էլ մտածեցի ինչու չօգտվել այս հնարավորությունից, ինչու իմ գործերը ավելի հասանելի չդարձնել մարդկանց»,– ասում է Մարիամը։
Ցուցահանդեսը բաց կլինի մինչև մարտի իննը։
