Ինչքան էլ չկիսեմ փողոցում գտնվող ընդդիմության մոտեցումները, բայց դա համակարգի հետևանք է․ Սարգսյան (տեսանյութ)
Աջակցիր «Ա1+»-ին«Մեր կուսակցությունը շատ կարևորում է պետության կառավարման համակարգի ձևը, համարում է, որ տվյալ համակարգի ընտրությունից է կախված պետության կառավարման ոչ կոնֆլիկտայնությունը, հետագա գործունեության համաչափությունը»։
Մամուլի ասուլիսի ժամանակ ասաց «Հանրապետություն» կուսակցության քաղխորհրդի նախագահ Արամ Սարգսյանը։
Սարգսյանը հիշեցրեց, որ նախորդ սահմանադրական հանրաքվեի ժամանակ «Հանրապետություն» կուսակցությունը ակտիվ «Ոչ»-ի կողմնակից էր, այն դեպքում, երբ «ՔՊ»-ն և մնացած այլ ընդդիմադիր ուժեր համարում էին հարցը երկրորդական և ոչ օրակարգային։ Սարգսյանն ընդգծեց, որ սահմանադրական նոր բարեփոխումների գործընթացին իր ներկայացրած կուսակցությունը ևս հիմա ակտիվ մասնակցություն ունի։ «Հարապետություն» կուսակցությունը հանձնաժողովում ունի իր ներկայացուցիչը։
Արամ Սարգսյանը հիշեցրեց, որ «Հանրապետություն» կուսակցությունը կողմնակից է կառավարման ամբողջական նախագահական համակարգին։ Ըստ նրա՝ գործադիր իշխանությունը որևէ կերպ բաժանել չի կարելի։ Սարգսյանի համոզմամբ կիսանախագահական համակարգում դա միջանձնային խնդիրների հիմնական պատճառը դարձավ։
«Այդ պատճառով է, որ Լևոն Տեր- Պետրոսյանի իշխանավարության ժամանակ կամային վարչապետների պարագայում լուրջ վեճ առաջացավ Լևոն Տեր- Պետրոսյանի և Վազգեն Մանուկյանի մեջ և այդ վեճը առ էսօր շարունակվում է»,-նկատում է Արամ Սարգսյանը։
Սարգսյանը հիշեցրեց նաև մյուս վեճերի մասին՝ Տեր Պետրոսյան-Քոչարյան, Ռոբերտ Քոչարյան-Վազգեն Սարգսյան։
Նրա համոզմամբ եղել են նաև ստվերային պատերազմներ՝ ինչպես օրինակ՝ Քոչարյանի և Սարգսյանի միջև։
Անդրադառնալով խորհրդարանական համակարգին՝ Սարգսյանն ընդգծեց․
«Խորհրդարանական համակարգում պատգամավորներ են որոշում, թե ով պիտի լինի երկրի ղեկավարը, իսկ մեր ժողովուրդը ընտրություններում ուզում է ընտրել առաջնորդին»։
Սարգսյանի եզրահանգմամբ խորհրդարանը օրենսդիր մարմնից վեր է ածվում ընտրող մարմնի։
«Ինչքան էլ ես չկիսեմ էսօրվա փողոցում գտնվող ընդդիմության մոտեցումները, բայց որ իրանք էսօր փողոցում են, նաև էս համակարգի հետևանքն է»․ընդգծեց Արամ Սարգսյանը։