Համայնքային բյուջեները չեն բավարարում, որ որոշ մանկապարտեզներ գործեն ամբողջ տարի. փոխնախարար
Աջակցիր «Ա1+»-ինՀայաստանում կան մանկապարտեզներ, որոնք կարող են գործել ամբողջ տարին, սակայն գործում են ընդամենը մի քանի ամիս, քանի որ համայնքային բյուջեն չի բավարարում: Այս մասին ԱԺ-ում ասաց ՀՀ ԿԳՄՍ փոխնախարար Ժաննա Անդրեասյանը։
«Մենք չենք ուզում ունենալ իրավիճակ, որ մենք սարքում ենք մանկապարտեզը, ունենում ենք ամբողջական արդիական ենթակառուցվածք, սակայն դա փաստացի չի գործում: Մենք սեպտեմբերին արեցինք ուսումնասիրություն, և հանրապետությունում ունեինք շուրջ 50 մանկապարտեզ, որոնք կարող էին գործել, սակայն չեն գործում, որովհետև համայնքային բյուջեն չի բավարարում, որ մանկապարտեզը գործի»,- ասաց փոխնախարարը:
Կան մանկապարտեզներ, որոնք գործում են տարվա մեջ մի քանի ամիս, պատճառը կրկին համայնքային բյուջեն է, այն չի բավարարում, որ մանկապարտեզը գործի ամբողջ տարին: Անդրեասյանը վստահեցնում է, որ այս խնդիրը նախարարության ուշադրության կենտրոնում է:
«Մենք ուզում ենք իրապես լուծում գտնել, որը թույլ կտա երեխաներին ամբողջ տարին նախադպրոցական կրթության մեջ ընդգրկված լինել և դա անել որակյալ ու արդիական պայմաններում»,-նշեց փոխնախարարը: