«Մարդիկ կան, որ նայում են, ասում են՝ սա Հադրութի մեր տուննա»․ցուցահանդես- վաճառք՝ ի աջակցություն պատերազմից տուժած երեխաների
Աջակցիր «Ա1+»-ինՈւնկնդրել դասական երաժշտություն գեղատեսիլ լեռներում, անցկացնել անմոռանալի երեկո գեղեցիկ միջավայրում, և, որ ամենակարևորն է, օգնել երեխաներին, որոնք տեսել են պատերազմի արհավիրքն ու կորցրել հայրենի հողում ապրելու իրավունքը:
«Գառնի» պատմամշակութային արգելոց-թանգարանի տարածքում անցկացվեց «Երեխաները ուզում են խաղալ» բարեգործական երեկոն, որը կազմակերպվել էր աջակցելու այն երեխաներին, ում ընտանիքները Արցախյան 44-օրյա պատերազմի հետևանքով ստիպված էին լքել իրենց տները:
Երեկոյի կազմակերպիչների՝ Moscow Classic Ensemble-ի տնօրեն Մարիա Քալաշյանի և Նանա Մարտիրոսյանի խոսքով, միջոցառման անվանումը պատահական չէր ընտրված: Պատահական չէր նաև երեկոյի թեմատիկ գույնը՝ սպիտակը, որը խորհրդանշում է խաղաղությունը, մաքրությունն ու ներդաշնակությունը:
«Պատերազմը շատերին զրկեց հարազատ օջախից, հարազատներից: Նրանք կորցրել են վստահությունը վաղվա օրվա հանդեպ, կորցրել են իրենց երազանքները, իսկ նրանց երեխաները կորցրել են հոգու անդորրը: Բարի գործերը միավորում են մարդկանց և համախմբում նրանց, ովքեր պատերազմի ընթացքում և մինչ օրս օգնում են կյանքի դժվարին պայմաններում հայտնված ընտանիքներին»,- ասում է Մարիա Քալաշյանը:
Բարեգործական երեկոյի շրջանակում, բացի համերգային ծրագրից կազմակերպել էին նաև արցախցի, մասնավորապես հադրութցի վարպետների և պատանի նկարիչների գործերի ցուցահանդես-վաճառք: Երեխաների ընտանիքները, որոնց աշխատանքները ներկայացված էին, նույնպես տուժել են Արցախյան 44-օրյա պատերազմի հետևանքով:
12-ամյա Անահիտը, որ նկարում է, իր խոսքով վաղ մանկուց, նաև հիմա սովորում է Չայկովսկու անվան երաժշտական դպրոցում, դաշնամուր ու ֆլեյտա է նվագում: «Նկարել շատ եմ սիրում: Բայց դեռ չեմ կողմնորոշվել երաժիշտ եմ դառնալու, թե նկարիչ: Բայց, որ արվեստի մարդ եմ լինելու, հաստատ որոշել եմ»,-ասում է հադրութցի աղջնակը: Հիմա միայն Հադրութի փողոցներն ու եկեղեցիներն է նկարում: «Հիմա էլ մեր Հադրութի Օխտը դուռն եմ նկարում։ Մարդիկ կան, որ գալիս, նայում են, ասում են սա մեր փողոցնա, մեր տուննա»,- թախիծը ձայնում անկեղծանում է Անահիտն ու հետո աշխուժանում: «Գիտեք, այսօր ցուցահանդես-վաճառքին ներկայացրած իմ նկարներից գնել են»:
«Եկանք , տեղավորվեցինք, անցավ մի որոշ ժամանակ, հասկացանք, որ Հադրութը կորցրել ենք»,- «Ա1+»-ի հետ զրույցում ասում է Հադրութի ստեղծագործական կենտրոնի ղեկավար Իրինա Թամրազյանը, ով մասնագիտությամբ նկարիչ է: - Մեր կոլեկտիվի անդամները զանգում էին, հարցնում, հիմա ինչ անենք, ստեղծագործող մարդիկ ենք, առանց մեր գործի չենք կարող, զբաղված որ լինենք, մեր ողբերգության մասին գոնե մի փոքր քիչ կմտածենք: Հադրութում մեզ տարբեր հիմնադրամներ օգնում էին: Հիմա էլ իմ կապերն օգտագործեցի ու հունվարին արդեն ունեցանք մեր կենտրոնը: Սա մեր հինգերորոդ ցուցահանդես-վաճառքն է:
Առաջին ցուցահանդեսը մարտի 15-ին կայացավ, պատմում է տիկին Իրինան, Արա Գևորգյանը օգնեց: Նկարչական նյութերը բերեց հանձնեց խմբակին: 45 սաների գործերը ուղարկեցին Մոսկվա, թվով 80 գործ ձեռագործ ու նկար: Վաճառքից ստացած հասույթով նոր խմբակներ բացեցին:
«Կենտրոնը պետության կողմից չի ֆինանսավորվում: Մենք ստեղծում ենք, վաճառում ու ինքնաֆինանսավորվում: Ֆրանսիայից երիտասարդներ եկան մեր կենտրոն, իրենց նախաձեռնությամբ 46 գործ տարան Բելգիա, վաճառեցին ու այդ գումարը ուղարկեցին մեզ: Կամաց-կամաց խմբակներն ավելացան ու այսօր Արցախի շտաբի շենքում, Նժդեհի 23/1 գործում է Հադրութի երեխաների ստեղծագործության կենտրոնը»:
320 սան ունեն՝ Շուշիից, Քաշաթախից, Քարվաճառից ու նաև Երևանից են, 39 խմբակ և 25 խմբավար, որոնք հադրութցիներ են: Մասիսում, Վանաձորում և Էջմիածինում էլ արդեն խմբակներ են բացել՝ կարպետագործության, գորգագործության ու պարի:
Հովանավորի օգնությամբ, այս ութ ամսվա ընթացքում ձեռք են բերել կավագործության անիվ և շուտով կբացեն կավագործության խմբակ ևս, որ ունեցել են Հադրութում: «Տերյան մշակութային կենտրոնը» նվիրել է մոլբերտներ ու հիմա երեխաներն արդեն ավելի պրոֆեսիոնալ մոտեցմամբ են ստեղծագործում»,- մանրամասնում է տիկին Իրինան:
Նրա խոսքով, հիմա հադրութցի երեխաները հիմնականում իրենց հայրենի հիշարժան վայրերը, Հադրութի եկեղեցիներն են նկարում:
«Եվ, նրանցից շատերի Հադրութը պատկերած կտավները, պատկերացնում եք, Բելգիայում են գտնվում»,- հպարտությունը չթաքցնելով ասում է նա:
Բարեգործական երեկոյից ստացված հասույթը կուղղվեն արցախցի շնորհալի երեխաների համար երաժշտական գործիքների և համերգային հագուստների ձեռքբերմանը, իսկ ցուցահանդես-վաճառքից ստացված գումարը կտրամադրվի այդ երեխաների ընտանիքներին, ինչպես նաև երաժշտական դպրոցներում ուսման վարձի վճարմանը: