Բացել լրահոսը Փակել լրահոսը
AFAD4319-3651-41C7-88FB-E780E0344C36_w1023_r1_s
A A
Քաղաքականություն

ԱՄՆ պետքարտուղարությունը ամերիկացիներին կոչ է արել ձեռնպահ մնալ Ռուսաստան այցելելուց

ԱՄՆ պետքարտուղարությունը թարմացրել է Ռուսաստանի վերաբերյալ իր ճանապարհորդային ուղեցույցները՝ ամերիկացիներին կրկին կոչ անելով չայցելել ՌԴ:

Իր մեկնաբանություններում գերատեսչությունը նշել է դեպքեր, երբ ԱՄՆ քաղաքացիները, ներառյալ նախկին և ներկա պետական պաշտոնյաներն ու զինվորական անձնակազմը, ինչպես նաև գործարարները, Ռուսաստան այցելելիս կամ այս երկրում բնակվելիս, առանց պատճառի հարցաքննվել են կամ ենթարկվել սպառնալիքների ռուսաստանցի պաշտոնյաների կողմից:

Ռուսաստանում ամերիկացիները «կարող են դառնալ հալածանքների, չարաշահումների և շորթումների զոհեր», - ասել է պետքարտուղարությունը:

Գերատեսչությունը նշել է, որ պետական բոլոր պաշտոնյաները պետք է ուշադիր կշռադատեն Ռուսաստան մեկնելու անհրաժեշտությունը:

«Ռուսական անվտանգության ծառայությունները կեղծ մեղադրանքներով ձերբակալել են ԱՄՆ քաղաքացիներին, մերժել նրանց արդար և թափանցիկ վերաբերմունք ունենալու իրավունքը, դատապարտել փակ դատավարությունների ընթացքում առանց որևէ ապացույցների»,-նշել է գերատեսչությունը:

«Ռուս պաշտոնյաները կարող են անհիմն հետաձգել կալանավորված ամերիկացի քաղաքացիներին հյուպատոսական օգնության տրամադրումը», - ասված է հաղորդագրության մեջ:

«Ռուսաստանի իշխանությունները կամայականորեն կիրառում են տեղական օրենքները ԱՄՆ -ի քաղաքացի հանդիսացող կրոնական առաջնորդների նկատմամբ և կասկածելի քրեական հետաքննություն սկսում կրոնական գործունեությամբ զբաղվող ԱՄՆ քաղաքացիների նկատմամբ», - նշել է պետքարտուղարությունը:

«Ռուսական անվտանգության ծառայությունները գնալով էլ ավելի կամայականորեն են կիրառում տեղական օրենքները օտարերկրյա և միջազգային կազմակերպությունների նկատմամբ, որոնք նրանք համարում են« անցանկալի », և ԱՄՆ քաղաքացիները պետք է խուսափեն Ռուսաստան այցելելուց՝ աշխատանքի բերումով կամ հասարակական կազմակերպություններում կամավոր գործունեություն ծավալելու համար»,-ասված է հայտարարության մեջ:

Ըստ պետքարտուղարության՝ Ռուսաստանը հատուկ սահմանափակումներ է կիրառում Միացյալ Նահանգների և Ռուսաստանի երկքաղաքացիություն ունեցող անձանց նկատմամբ և կարող է հրաժարվել այդ անձանց ամերիկյան քաղաքացիությունը ճանաչելուց՝ ներառյալ հյուպատոսական օգնությունից նրանց զրկելն ու վերջիններիս Ռուսաստանից հեռանալու խոչընդոտումը:

«Ռուսաստանում չեն երաշխավորվում խաղաղ հավաքների և խոսքի ազատության իրավունքները, և ԱՄՆ քաղաքացիները պետք է խուսափեն քաղաքական կամ սոցիալական բողոքներին մասնակցելուց», - ասված է հայտարարության մեջ:

Գերատեսչությունը նաև զգուշացրել է, որ միջազգային և տեղական ահաբեկչական կազմակերպությունները, ինչպես նաև ծայրահեղական գաղափարախոսություն կրող անձինք շարունակում են ահաբեկչություններ ծրագրել Ռուսաստանում:

«Ահաբեկիչները կարող են առանց նախազգուշացման հարձակում գործել՝ թիրախավորելով զբոսաշրջային վայրերը, տրանսպորտային հանգույցները, շուկաները կամ առևտրի կենտրոնները, կառավարական շենքերը, հյուրանոցները, ակումբները, ռեստորանները, զբոսայգիները, խոշոր սպորտային և մշակութային իրադարձությունները, կրթական հաստատությունները, օդանավակայանները և այլ հասարակական վայրեր», - նշված է հայտարարության մեջ:

Պետքարտուղարությունը նշում է, որ ԱՄՆ իշխանությունների ՝ Ռուսաստանում ամերիկացի քաղաքացիներին սովորական և արտակարգ իրավիճակների ծառայություններ մատուցելու կարողությունը խիստ սահմանափակ է, հատկապես Մոսկվայում դեսպանատնից և հյուպատոսություններից հեռու գտնվող տարածքներում, քանի որ Ռուսաստանի կառավարությունը սահմանափակել է դիվանագիտական ներկայացուցչությունների անձնակազմը և կասեցվել է հյուպատոսական ծառայությունների մատուցումը: