ՀՅԴ-ն հանդես է գալու իբրև արմատական ընդդիմություն և հետամուտ է լինելու այս իշխանությունների հեռացմանը։ Ասուլիսում այս մասին հայտարարեց ՀՅԴ Հայաստանի Գերագույն մարմնի ներկայացուցիչ, «Հայաստան» դաշինքի անդամ Իշխան Սաղաթելյանը, որը երեկ ՀՅԴ Գերագույն ժողովում վերընտրվել էր որպես ԳՄ ներկայացուցիչ։

Իրենց անելիքների մեջ են, ինչպես նա ներկայացրեց, Արցախի հանրապետության անկախության ճանաչումը, տարածքային ամբողջականության վերականգնումը, տեղահանված անձանց իրավունքների պաշտպանությունը։

«Վճռականորեն հակազդելու ենք մեր երկրի տարածքային ամբողջականությունը, սահմանների անձեռնմխելիությունն ու իշխանությունը վտանգող գործընթացներին, ՀՀ Զինված ուժերի կազմաքանդմանն ուղղված և ագզային-հոգևոր հաստատությունների՝ Հայ առաքելական սուրբ եկեղեցու դեմ իրականացվող օրվա իշխանությունների քողարկված և բացահայտ քայլերին ու գործողություններին», - ասաց Իշխան Սաղաթելյանը։

Նա նշեց, որ ընտրությունների ընթացքում ՀՅԴ շատ համայնքապետերի վրա իշխանությունը ճնշումներ է գործադրել ու նրանք դիմելու են այդ խնդրով միջազգային տարբեր կառույցների։

Լրագրողը հարցեց՝ գուցե իշխանությունը հակադարձի և նշի, որ դա ներքին խնդիր է, արդյոք ներքին գործիքակազմ չկա՞՝ հարցը լուծելու համար։ Սաղաթելյանը պատասխանեց, որ եթե իշխանությունների թելադրանքը չեն կատարել, բոլոր մնացածի հանդեպ են ճնշումներ գործադրել։

«Մենք կազմակերպում ենք այդ համայնքների ղեկավարների իրավունքների պաշտպանության գործընթացը՝ սկսած փաստաբանական ծառայություններից։ Մենք իրենց կողքին ենք։ Փաստերն արձանագրելու համար, կարծում ենք, էական և կարևոր է նաև միջազգային կազմակերպություններին նկարագրելը։

Ժողովրդավարությունից հաճախ խոսող իշխանությունը կապ չունի դրա հետ։ Այս մարդիկ ձգտում են հաստատել մեկ անձի ու կուսակցության դիկտատուրա», - ասաց Սաղաթելյանը։

ՀՅԴ ԳՄ անդամ Արծվիկ Մինասյանն էլ նշեց, որ այն, ինչ արել են քարոզարշավի և ընտրությունների ժամանակ վարչապետի պաշտոնակատար Նիկոլ Փաշինյանն ու պաշտոնատար շատ անձինք, համարվում է քրեական հանցագործություն։

Խորհրդարանում օր ու արև չեն տալու այս իշխանություններին, վստահեցրեց Իշխան Սաղաթելյանը, բովանդակային առումով ու բոլոր հնարավոր միջոցներով․ «Դուք իմացեք՝ ի դեմս «Հայաստան» դաշինքի ունեք 29 պատգամավոր, որ գիշեր-ցերեկ պայքարելու է այս իշխանությունների դեմ՝ սկսած հարցադրումներից մինչև քննիչ հանձնաժողովներ կյանքի կոչելը»։

Եթե իշխանությունը փաստեր ունենար «Հայաստան» դաշինքի կողմից մարդկանց ուժով հավաքների տանելու, Սաղաթելյանի խոսքով, վաղուց բոլորին ձերբակալած կլինեին․ «Սրանց ձեռքը ճար լինի, մեզ ձայն տված 270 հազար քաղաքացիներին էլ հատ-հատ կձերբակալեն»։

Թեև Դաշնակցությունը հաճախ էր խոսում փողոցային պայքարի մասին, սակայն Իշխան Սաղաթելյանը նշեց, որ այս փուլում փողոցային պայքարն արդյունավետություն չի ունենա։