Փաշինյանի որոշումից հետո
Աջակցիր «Ա1+»-ինԱրտակարգ իրավիճակների նախարարության սեյսմիկ պաշտպանության վարչության գործունեությունը դադարեցվում է․ այս մասին նշվում է վարչապետի պաշտոնակատար Նիկոլ Փաշինյանի որոշման մեջ։
Նույն որոշմամբ՝ ուժը կորցրած է ճանաչվում Հայաստանի Հանրապետության վարչապետի 2018 թվականի հունիսի 11-ի «Հայաստանի Հանրապետության արտակարգ իրավիճակների նախարարության կանոնադրությունը հաստատելու մասին» N 740-Լ որոշմամբ հաստատված՝ Հայաստանի Հանրապետության արտակարգ իրավիճակների նախարարության կանոնադրության 33-րդ կետի 4-րդ ենթակետը:
Այսինքն՝ նախարարության կառուցվածքային ստորաբաժանումներից դուրս է գալիս սեյսմիկ պաշտպանության վարչությունը։
Այս որոշումը քննարկումների առիթ է դարձել սոցիալական հարթակներում: Օգտատերերը քննադատում են Նիկոլ Փաշինյանին Սեյսմիկ պաշտպանության վարչությունը փակելու համար՝ անգամ հեգնելով՝ Հայաստանում այլեւս երկրաշարժ չի՞ լինելու:
Արձագանքելով տարաբնույթ մեկնաբանություններին՝ ԱԻՆ-ը պարզաբանում է ներկայացրել։
«Հաշվի առնելով «Սեյսմիկ պաշտպանության տարածքային ծառայություն›› ՊՈԱԿ-ի գործառույթները՝ մասնավորապես հարաբերությունները տարբեր միջազգային կազմակերպությունների հետ, դիտացանցի աշխատանքների կարևորությունը, ինչպես նաև մասնագիտական այլ գործառույթներ, կառավարությունն առավել նպատակահարմար է համարել, որ Արտակարգ իրավիճակների նախարարության սեյսմիկ պաշտպանության վարչությունը կշարունակի գործել նախկին կարգավիճակով՝ որպես ՊՈԱԿ»,- ասված է պարզաբանմամ մեջ։
Հիշեցնենք, որ օրեր առաջ՝ հունիսի 24-ին, Հայաստանի Հանրապետության կառավարությունը որոշել է դադարեցնել «Սեյսմիկ պաշտպանության տարածքային ծառայություն» պետական ոչ առևտրային կազմակերպության լուծարման գործընթացը:
Ըստ այդմ՝ ուժը կորցրած է ճանաչվել Հայաստանի Հանրապետության կառավարության 2020 թվականի հունիսի 18-ի «Սեյսմիկ պաշտպանության տարածքային ծառայություն» պետական ոչ առևտրային կազմակերպությունը լուծարելու մասին» N 975-Ա որոշումը:
Հավելենք, որ այս տարվա սկզբին ԱԻՆ-ը հանդես էր եկել՝ այսօրվանից գործունեությունը դադարեցրած վարչության վերաբերյալ օրենսդրական նախաձեռնությամբ:
Ըստ նախագծի՝ «Սեյսմիկ պաշտպանության մասին» Հայաստանի Հանրապետության օրենքի 12-րդ հոդվածով սահմանված գործառույթների ապահովումն իրականացնելու նպատակով անհրաժեշտ է, որպեսզի կառույցում վարչության փոխարեն ստեղծվի գրասենյակ, որի արդյունքում կպահպանվեն սեյսմիկ անվտանգության ապահովման ոլորտում գործող ստորաբաժանումները՝ դիտակետեր, դիտակայաններ և այլ կառույցներ:
Փաստորեն՝ նախագիծը չընդունվեց, բայց որոշում եղավ: