Ռուսաստանը պատասխան կտա մրգերի համար
ՈՒԵՖԱ-ի կարգապահական կոմիտեն պատրաստվում է գործ հարուցել Ռուսաստանի հավաքականի երկրպագուների դեմ: Այդ մասին տեղեկացնում է «Սովետսկի սպորտ» թերթը:
Կարգապահական կոմիտեն մանրակրկիտ ուսումնասիրում է ռուս ֆուտբոլասերների պահվածքը սեպտեմբերի 3-ին կայացած Անդորա - Ռուսաստան ընտրական խաղի ժամանակ:
Ըստ ՈՒԵՖԱ-ի ունեցած տվյալների, ռուս ֆուտբոլասերների մի մասը մտել են մարզադաշտի հարեւանությամբ գտնվող մասնավոր այգի եւ այնտեղից քաղած մրգերը նետել են խաղադաշտ: Բացի այդ` Անդորայի լրատվամիջոցների ունեցած տվյալներով, հյուրերը նաեւ ազգայնամոլական վանկարկումներ են արել խաղի ժամանակ:
Այդ խաղի ՈՒԵՖԱ-ի ներկայացուցիչն իր զեկուցագրում տեղեկացրել է, որ ռուս ֆուտբոլասերները ճայթրույքներ են օգտագործել, սակայն մյուս միջադեպերի մասին ոչինչ չի նշել:
Հիշեցնենք, որ Ռուսաստանի ընտրանին հանդես է գալիս ընտրական այն խմբում, որտեղ ընդգրկված է նաեւ Հայաստանի հավաքականը:
