Մեկնարկել է ընտրակաշառատուների բերքահավաք․ Նիկոլ Փաշինյան (տեսանյութ)
Աջակցիր «Ա1+»-ինՍյունիքի մարզից գնալով դեպի Վայոց ձոր՝ վարչապետի պաշտոնակատար Նիկոլ Փաշինյանը Վայքում քաղաքացիների հետ հանդիպմանն ասաց, որ մի քանի կարևոր նորություններ ունի հայտնելու։
Դրանցից մեկը վերաբերում էր ընտրակաշառք բաժանողներին, և ինչպես ներկայացրեց Փաշինյանը՝ «մեկնարկել է ընտրակաշառատուների բերքահավաք» և այս պահին 5 հոգի կալանավորված կա։
«Այսօր նաև լուր տարածվեց, որ Սերժ Սարգսյանի եղբոր որդին դատապարտվել է ազատազրկման։ Երկու օր առաջ լուր տարածվեց, թե Սերժ Սարգսյանի մյուս եղբոր որդին ազատ է արձակվել քրեական պատասխանատվությունից։ Ես սովորաբար մեր դատական համակարգը քննադատում եմ, բայց հիմա ուզում եմ մի քանի խոսք ասել ի պաշտպանություն դատական համակարգի։ Սերժ Սարգսյանի մի եղբոր որդին ազատ է արձակվել, մյուսը՝ դատապարտվել, 5 ընտրակաշառատու կալանք են ստացել։ Ես մտածում եմ, որ մեր դատական համակարգում տեղի են ունենում շատ լուրջ և խորքային-բովանդակային փոփոխություններ», - ասաց Նիկոլ Փաշինյանը։
Այդ փոփոխությունները, նրա խոսքով, չեն բացառում անարդար դատավորների ներկայությունը, սակայն կան նաև անկաշառ դատավորներ։
«Տեղ-տեղ իրավական գնահատականները չեն համընկնում և պետք էլ չի, որ համընկնեն քաղաքական գնահատականների հետ, որովհետև իրավաբանությունը բավականին բարդ և խորը երևույթ է։ Մեր նպատակը դատական համակարգին փակ աչքերով վստահելն է»,-ասաց Փաշինյանը։
Նա նաև նշեց, որ չպետք է սխալ մեկնաբանել, ինքը չի ասում, որ այն դատավորը, որ Սերժ Սարգսյանի եղբոր որդուն բաց է թողել, նա վատն է, իսկ նա, որ դատապարտել է մյուս եղբոր որդուն, լավն է․ «Ո՛չ, ես կարծում եմ, որ երկուսն էլ հավասարաբար լավն են, որովհետև նրանք առաջնորդվել են ոչ թե ինչ-որ տրամաբանությամբ, այլ վերլուծել են իրենց ձեռքի տակ եղած փաստերն ու հիմնվելով օրենքի վրա՝ կայացրել են որոշում»։