«Բարգավաճ Հայաստան» կուսակցության քարոզարշավը շարունակվում է արդեն Գեղարքունիքի մարզի Գավառ քաղաքից։ Քարոզարշավի սկզբում ԲՀԿ վարչապետի թեկնածու Գագիկ Ծառուկյանը տեղի եկեղեցի մտավ, մոմ վառեց ու զրուցեց եկեղեցում ներկա քաղաքացիների հետ։

Եկեղեցու բակում նրան արդեն մարդկանց մեծ բազմություն էր սպասում։ Մի քանի սպորտսմեն փոքրիկներ էլ մոտեցել էին Ծառուկյանին՝ ցույց տալով իրենց հաղթական մեդալները։ Եկեղեցուց մի փոքր հեռու Գագիկ Ծառուկյանին դիմավորեցին զուռնա դհոլով և աղ ու հացով։ Երիտասարդները ՀՀ ու ԲՀԿ դրոշներով միջանցք էին կազմել՝ ճանապարհ բացելով ծառուկյանի համար դեպի բեմ։ Ծառուկյանը շնորհակալություն հայտնեց ջերմ ընդունելության համար ու նշեց, որ ժողովրդին ոչ մի սուտ բան չի ասելու, միայն ճշմարտությունն ու այն, ինչ կա։

«Ծառուկյանը կայացած մարդ է, ունևոր մարդ է, տեսած մարդ է, ճանաչված մարդ է, Ծառուկյանի հիմնական նպատակը, որ կարողանա ամեն մարդ իր հնարավորությունն ի օգուտ իր երկրի, իր ժողովրդի», - ասաց Գագիկ Ծառուկյանը։

Նրա խոսքով՝ կորոնավիրուսից հետո շատ մարդիկ աշխատանք չունեն, բայց ստիպված վարկեր են վերցրել՝ առողջապահական, ուսումնական ծախսերը հոգալու համար ու հիմա դժվարությամբ են կարողանում փակել այդ վարկերը․ «Երկու միլիոն մարդ ունի երեք միլիոն դրամ վարկ, պետք է ներում շնորհվի, մարդկանց սեփականությունը հետ վերադարձնեն, որ մարդիկ կարողանան նորից սկսել»։

Անվտանգությունն ապահովելու մի ճանապարհ է տեսնում Գագիկ Ծառուկյանը՝ Ռուսաստանը, մեր դարավոր բարեկամը, որ միշտ ցույց է տվել, որ մեր կողքին է։

Նա նաև անդրադարձավ գյուղատնտեսության զարգացմանը, որն ամենակարևոր ճյուղերից է Հայաստանում․ «Գյուղացու բերքը պետք է գետնին չմնա։ Արաբական երկիրը օրական 2 հազար տոննա, որ մեզնից հեռու է 3 ժամվա թռիչքով, մթերք բանջարեղեն է ընդունում, մենք ոչ մի բան չենք տալիս։ Պետք է կազմակերպվի՝ ինչ ենք կարում մշակենք, ինչ ենք կարում արտադրենք։ Այսօր ով մշակում է, չի կարողանում իր ծախսերը հոգալ»։

Ծառուկյանը կոչ արեց ժողովրդին չկոտրվել, չհիասթափվել ու մասնակցել արտահերթ ընտրություններին։ Պարտադիր չէ գնալ ու ձայն տալ գեղեցիկ խոսողներին, այլ պետք է նայել մարդու ապրածին ու արած գործերին։