Հայաստան ԵԱՀԿ 9 պետություններից ժամանած տասնմեկ փորձագետներ ընտրություններին դիտորդական առաքելություն կիրականացնեն, այս մասին ասուլիսում ասաց առաքելության ղեկավարող Էողան Մերֆին:

Նրա խոսքով՝ ԵԱՀԿ ժողովրդավարական հաստատությունների և մարդու իրավունքների գրասենյակը (ԺՀՄԻԳ) հայցել է ևս 24 երկարաժամկետ դիտորդների, որոնք մայիսի 26-ից լինելու են երկրի ողջ տարածքում։

«Ընտրությունների օրը իրադարձություններին հետևելու նպատակով ԵԱՀԿ երկրներից ԺՀՄԻԳ-ը նախատեսում է հայցել ևս 250 կարճաժամկետ դիտորդների։ Այնուամենայնիվ, սա կախված է լինելու ՔՈՎԻԴ-19 համաճարակին առնչվող զարգացումներից», - ասաց Մերֆին։

Առաքելությունը, նրա խոսքով, գնահատելու է, թե որքանով են ընտրությունները համապատասխանելու ԵԱՀԿ պարտավորություններին, ժողովրդավարական ընտրությունների չափանիշներին և ազգային օրենսդրությանը։

«Դիտորդներն ուսումնասիրելու են իրավական դաշտը և դրա իրականացումը, հետևելու են նաև քարոզարշավի ընթացքին, անդրադառնալու են ընտրողների հաշվառման-գրանցման հարցերին։ Մեդիամոնիտորինգը ևս կազմելու է այս դիտորդական առաքելության անբաժան մասը», - ասաց նա։

Դիտորդության ընթացքում, ինչպես նշվեց, տեղի կունենան նաև հանդիպումներ տարածքային և պետական իշխանությունների, քաղաքական կուսակցությունների, դատական համակարգի, քաղաքացիական հասարակության և լրատվամիջոցների ներկայացուցիչների հետ։

«Ա1+»-ի հարցին, թե սահմանային լարված իրավիճակն ինչպե՞ս կարող է ազդել ընտրությունների անցկացման վրա, Մերֆին պատասխանեց, որ իրենք երկրորդ օրն է՝ ինչ Հայաստանում են։ Երեկ հանդիպումներ են ունեցել Արտաքին գործերի նախարարի տեղակալի և Կենտրոնական ընտրական հանձնաժողովի նախագահի հետ և Հայաստան ժամանելու պահից մինչև ընտրության օրից էլ հետո դիտարկելու են տեղի ունեցող գործընթացները:

«Ես չեմ կարող ենթադրություններ անել, թե ինչ կարող է տեղի ունենալ։ Թիմն այստեղ է և մենք աշխատում ենք»։

Հարցին, թե դրական կամ բացասական տեսանկյունից ի՞նչ ազդեցություն կարող են ունենալ ընտրությունների վրա օրենսդրական վերջին փոփոխությունները, Մերֆին պատասխանեց, որ այսօր են սկսում դիտորդական առաքելության աշխատանքները և այս պահին չեն կարող այդ հարցի վերաբերյալ դիտարկումներ ներկայացնել:

«Այս ընթացքում ուսումնասիրելու ենք Հայաստանի օրենսդրությունը և դրա համապատասխանությունը միջազգային չափանիշներին, նաև օրենսդրության կիրառումը։ Մենք դիտարկելու ենք նաև ընտրության օրը տեղի ունեցող իրադարձությունները»։

Սա Հայաստանում արտահերթ ընտրություն է և արդյոք այն կազդի աշխատանքի, դիտորդների քանակի վրա, Էողան Մերֆին նշեց, որ մայիսին Հայաստանում կատարել են կարիքների գնահատում, այդ առաքելության շրջանակներում հանդիպել են ԿԸՀ-ի, քաղհասարակության և քաղաքական կուսակցությունների հետ և ձևավորել են պատկերացում, թե ինչպիսի դիտորդական աշխատանք է անհրաժեշտ կազմակերպել։

«Մենք արդեն այստեղ ենք 11 փորձագետների կազմով։ Նրանք մասնագիտացված են ընտրական գործընթացների տարբեր բաղադրիչներով», - ասաց նա։