Պետությունը անտեր է, միջազգային խաղաղապահներ են պետք․ լուծումը՝ նամակում (տեսանյութ)
Աջակցիր «Ա1+»-ին«Հայաստանի Եվրոպական» կուսակցությունը նամակ փոխանցեց ՀՀ Նախագահ Արմեն Սարգսյանին։ Նամակով ցանկանում էին, որ նախագահը ՄԱԿ Անվտանգության խորհրդում բարձրացնի ՀՀ տարածքային ամբողջականությունը և պետական ինքնիշխանությունը պաշտպանելու նպատակով Հայաստանում միջազգային խաղաղապահներ տեղակայելու հարցը։
«Վարչապետի ժամանակավոր պաշտոնակատար Փաշինյանի դիմումը ՀԱՊԿ-ին և ՌԴ իշխանություններին նման է ծաղրի, քանի որ հենց Ռուսաստանի ղեկավարությունն է համակարգում ՀՀ դեմ իրականացվող ռազմական և քաղաքական սադրանքները», - ասված էր նամակում, որ ընթերցում էր կուսակցության քաղխորհրդի նախագահ Արկադի Վարդանյանը։
Հաշվի առնելով այն հայտարարություններն ու դիրքորոշումը, որ ցույց է տվել Արմեն Սարգսյանը, Արկադի Վարդանյանի կարծիքով՝ նա պետք է դրական արձագանք տա նամակին և ճիշտ ժամանակին դիմի միջազգային կառույցներին։
«Այս օրերին լուծվում են քաղաքակրթական հարցեր։ Ինչպես Եվրոպան, այնպես էլ ԱՄՆ-ը պետք է, որ մտահոգված լինեն ստեղծված իրավիճակով և օգնության ձեռք մեկնեն հայ ժողովրդին, Հայաստան պետությանը, որ փաստացի անտեր է մնացել։ Բայց մենք չենք կարծում, որ այսպես անտեր էլ կթողնենք։
«Մենք ենք տերը մեր երկրի»՝ ինչպես ասում են, և մենք մեր բոլոր լծակները, հեղինակությունը, ազդեցությունը կօգտագործենք մեր տարածքային ամբողջականությունն անսասան պահելու համար», - ասաց Արկադի Վարդանյանը։
Նա կոչ արեց արևմտամետ, պետականամետ, հակապուտինյան կողմնորոշում ունեցող քաղաքական ուժերին համախմբվել և փորձ անել միասնական ուժերով կանգնեցնել ադրբեջանցիների հերթական ոտնձգությունները։
«Ես կոչ չեմ անում գալ, համախմբվել Եվրոպական կուսակցության շուրջ, այլ համախմբվել գաղափարի շուրջ։ Մեր հասարակության մեծամասնությունը պետք է իր ուղեղից հանի այն լեգենդներն ու հեքիաթները, որ հրամցվել են վերջին 100 տարիների ընթացքում՝ սկզբից բոլշևիկյան, հիմա էլ պուտինյան պրոպագանդայի միջոցով», - ասաց Արկադի Վարդանյանը։
Արկադի Վարդանյանը նամակը հանձնեց Նախագահի աշխատակազմի Քաղաքացիների դիմում-բողոքների բաժնի պետ Աշոտ Ալոյանին, վերջինս էլ նշեց, որ ըստ սահմանված կարգի այսօր արդեն նամակին ընթացք կտրվի։