Կոնգրեսականները կոչ են արել ԱՄՆ-ին ավելի քան 100 մլն դոլարի աջակցություն տրամադրել Հայաստանին և Արցախին
Աջակցիր «Ա1+»-ինԱՄՆ Կոնգրեսի հայկական հարցերով հանձնախումբը կոչ է արել ավելի քան 100 մլն ԱՄՆ դոլար տրամադրել Հայաստանին և Արցախին՝ Թուրքիայի և Ադրբեջանի կողմից նախորդ տարի իրականացված ավերիչ հարձակումներից հետո: Այս մասին հայտնում է Ամերիկայի հայ ազգային կոմիտեն։
Կոնգրեսականներ Ֆրանկ Փալոնեն, Ջեքի Սփիերը և Ադամ Շիֆը նամակում պահանջել են այդ ֆինանսավորման միջոցով ուղղակի աջակցություն տրամադրել Արցախի հայ բնակչությանը՝ պայմանների բարելավման, բժշկական և փախստականների աջակցության, ենթակառուցվածքների վերականգնման նպատակով:
Կոնգրեսականներն առաջարկում են նաև 2 մլն ԱՄՆ դոլար հատկացնել Լեռնային Ղարաբաղում կոնվենցիոնալ զենքի ոչնչացման ծրագրերին, 100 մլն ԱՄՆ դոլար՝ Հայաստանին ԱՄՆ պետդեպարտամենտի և ԱՄՆ Միջազգային զարգացման գործակալության միջոցով տնտեսական, կառավարման, օրենքի գերակայության և անվտանգության ոլորտներում աջակցության տրամադրման համար:
Միաժամանակ, օրենսդիր գործիչները հորդորել են դադարեցնել ամեն տեսակի ֆինանսական անվտանգային օգնությունն Ադրբեջանին, քանի դեռ դադարեցված չեն Հայաստանի և Արցախի դեմ բոլոր տեսակի հարձակումները:
