Ես վստահ եմ, մենք իշխանության գալու ենք․ ԲՀԿ պատգամավոր (տեսանյութ)
Աջակցիր «Ա1+»-ին«Եթե արտահերթ ընտրություններ անցկացնելու քաղաքական պայմանավորվածությունը չպահպանվի, այն շատ լուրջ բացասական ռեզոնանս կառաջացնի հասարակության մեջ, ժողովուրդը դուրս կգա պահանջելու պահպանել պայմանավորվածությունները»,-այս կարծիքին է«Բարգավաճ Հայաստան» խմբակցության պատգամավոր Միքայել Մելքումյանը, ով այս մասին նշեց խորհրդարանում լրագրողների հետ ճեպազրույցի ժամանակ։
Մելքումյանը վստահեցրեց՝ 17-ի ձևաչափը պահպանվելու է, չեն դադարեցնելու բողոքի ակցիաները, իսկ եթե հանկարծ ֆորսմաժորային իրավիճակ լինի, օրինակ՝ իշխանությունը հրաժարվի արտահերթից, 17-ն ամբողջ թափով կգործարկվի․
«Կսպասենք ապրիլի 20-ից հետո, եթե չլինի հրաժարական, ապա ժողովուդը դուրս կգա փողոց, և կարծում եմ՝ ոչ մի պայմանավորվածություն այլևս չի գործի»,- հայտարարեց Մելքումյանը:
Նաև նշեց՝ չի կարող որևէ մեկի ասածի վերաբերյալ երաշխիք տալ և պնդել, որ ընտրություններն անպայման տեղի կունենան, բայց ամեն դեպքում ենթադրում է՝ պայմանավորվածությունները չեն խախտվի:
«Ա1+»-ի հարցին, թե ԲՀԿ-ն մասնակցելո՞ւ է ընդդիմության՝ մարտի 28-ի հանրահավաքին, Մելքումյանն ասաց՝ հատուկ չեն քննարկել, ինքն, օրինակ, մասնակցելու է։
ԲՀԿ պատգամավորի դիտարկմանը, թե արտահերթ ընտրություններ հայտարարելով՝ Փաշինյանը փորձում է Գագիկ Ծառուկյանին հնազանդեցնել, արձագանքեց․
«Ծառուկյանին հնարավոր չէ հնազանդեցնել, պետք է արդար գնահատական տալ»։
Մելքումյանը հավելեց, որ ցուցակների հարց դեռ չեն քննարկել։
Ասաց՝ չեն քննարկել նաեւ՝ ինքը կլինի՞ ցուցակում, թե ոչ։
Ինչ վերաբերում է հարցին, թե վերջին շրջանում բանկերը վարկեր չեն տրամադրում, պատգամավորը տեղեկացրեց, որ Հայաստանում կա մոտ 1 մլն 700 հազար վարկառու, իսկ վարկերի ծավալը 8 մլրդ դոլար է, այն դեպքում, երբ պետության համախառն ներքին արդյունքը 12 մլրդ է, 8 մլրդ-ից 2 մլրդն էլ սպառողական վարկեր են․
«Պետք է մեր վարկառուներին ազատագրել, Եթե «Բարգավաճ Հայաստան» կուսակցությունը գա իշխանության, իսկ ես հավատում եմ, որ մենք անպայման իշխանություն ենք լինելու, ապա ազատագրելու ենք վարկառուների մեծ մասին»,- վստահեցրեց Միքայել Մելքումյանը: