Արցախում ծառայող ժամկետային զինծառայողների ծնողները Կառավարության մոտ ակցիա էին իրականացնում՝ պահանջելով ժամկետից շուտ զորացրել 44 օր պատերազմին մասնակցած զինվորներին։

Զինծառայողներից մեկի մայրը՝ Թերեզա Գրիգորյանը նշեց, որ վարչապետ Նիկոլ Փաշինյանին դիմել են, ասել է՝ հարցն օրակարգում է, քննարկումներ են գնում, բայց ոչ թե զորացրման համար, այլ ծառայության ժամկետները կրճատելու․

«Բայց մեր պահանջը զորացրումն է։ Էդ երեխեքն արժանի են։ Իրենք 44 օր հերոս էին, պատերազմն ավարտվեց ու նրանց բոլորը մոռացան, ոչ մեկ ոչ մի օր չհետաքրքրվեց նրանց առողջական վիճակով, չգնացին, տեսնեն՝ ինչ պայմաններում են շարունակում իրենց ծառայությունը»,- ասաց նա։

Ծնողներից Արմինե Չիբուխչյանի տղան պատերազմի սկսվելու պահին մեկ ամսվա ծառայող է եղել ու հենց սկզբում առաջնագիծ են տարել, ասում է՝ եթե կարող է մեկ ամսվա ծառայողը առաջնագծում կռվել, հնարավոր չէ՞ դրանից հետո նրան բուժննման ենթարկել, հասկանալ՝ ինչպես է հոգեբանորեն ընդունել պատերազմը, իր ընկերների մահը։

Զինծառայողներից շատերին ծնողները 7-8 ամիս է՝ չեն տեսել։ Ասում են՝ գոնե թողնեն արձակուրդ գան, տեսնեն երեխաներին, նրանք էլ բուժվեն, կազդուրվեն, նորից վերադառնան։

Ծնողներից երկուսը մտել էին Կառավարություն՝ վարչապետի հետ հանդիպման, սակայն դրսում սպասողներն  ասում էին՝ այդքան էլ մեծ սպասելիքներ չունեն, մի քանի անգամ էլ հավաքվել են, դիմել, բայց ոչինչ չի փոխվել։

Ծնողները դուրս եկան հանդիպումից և ներկայացրին արդյունքները․

«Ասացին՝ երկու շաբաթից կպատասխանեն՝ մեր պահանջը՝ կապված ծառայության կրճատման և սոցփաթեթի տրամադրման հետ դրական լուծում կունենա, թե ոչ», - ասացին նրանք։