ՀՀ երրորդ նախագահ Սերժ Սարգսյանի և մյուսների գործով դատական նիստից առաջ նրա աջակիցները հավաքվել էին Ավան և Նոր Նորք վարչական շրջանների ընդհանուր իրավասության դատարանի դիմաց և ակցիա էին իրականացնում։

Այնտեղ էին նաև ՀՀԿ-ական ու քաղաքական տարբեր գործիչներ՝ Արմեն Աշոտյանը, Մարգարիտ Եսայանը, Էդուարդ Շարմազանովը, Վահան Բաբայանը և այլք։

Սերժ Սարգսյանի աջակիցները՝ մինչ նրա ժամանելն ու դատական նիստի սկսվելը, տարբեր ելույթներով և կոչերով հանդես եկան։

Մարգարիտ Եսայանը ելույթի ընթացքում նշեց, որ սա սովորական դատավարություն չէ, արդեն երեք տարի շարունակ Հայաստանի Հանրապետությունում դատում են Արցախը, դատում են պետականությունը, դատում են մեր բանակն ու հերոսներին, գեներալներին․

«Մեկ տարի առաջ այստեղ երրորդ նախագահ Սերժ Սարգսյանը հայտարարեց, որ Արցախը երբեք չի եղել ու չի լինելու Ադրբեջանի կազմում, այսօր պիտի նորից կրկնենք, որ Արցախը երբեք չի լինելու Ադրբեջանի կազմում և մենք վերադարձնելու ենք Արցախը», - ասաց նա։

«Ռեֆորմիստներ» կուսակցության հիմադիր Վահան Բաբայանն ասաց, որ այսօր դատվում է պատմությունը և այդ պատմությունը կերտած մարդը․

«Դատողն էլ ովքե՞ր են՝ դասալիք դավաճաններ, որ ո՛չ Արցախի տեղն են իմացել, ո՛չ պատմությունը, ո՛չ բանակը, բայց  իրենց ստերով, կեղծիքներով, մարդկանց մոլորեցնելով եկել են իշխանության», - ասաց նա։

Նրա խոսքով՝ այսօր էլ միայն Սերժ Սարգսյանից են վախենում, որովհետև նա գիտի ամեն ինչ, ստեղծել է ամեն ինչ՝ բանակ, պետություն, անվտանգություն և այսօր անգամ նրա շողքի հետ են պայքարում։