Բացել լրահոսը Փակել լրահոսը
A A
Պաշտոնական

Երևանի մետրոպոլիտենը 40 տարեկան է․պարգևներ՝ մետրոյի աշխատակիցներին

Երևանի Կարեն Դեմիրճյանի անվան մետրոպոլիտենն արդեն 40 տարեկան է: Ռազմավարական կարևոր նշանակություն ունեցող այս կառույցը գործարկվեց 1981թ. մարտի 7-ին, և Երևանը դարձավ իր բնակչության թվի համեմատ այն փոքրաթիվ քաղաքներից մեկը, որը մետրո ունի: Հոբելյանական տարվա առթիվ Երևանի մետրոպոլիտեն է այցելել քաղաքապետ Հայկ Մարությանը

 «Մետրոպոլիտենը Հայաստանի և Երևանի հպարտությունն է, ես այդպես եմ ընկալում: Ցավով ուզում եմ նշել, որ Խորհրդային Միության փլուզումից հետո մենք ընդունել ենք ընդամենը մեկ կայարան, բայց, ինչպես գիտեք, ինքս երազում եմ և ամեն ինչ անում եմ և անելու եմ, որպեսզի այս նախագիծը շարունակվի: Մրցույթ է հայտարարված տեխնիակական բնութագրի, այսինքն՝ երկու ամսից կունենանք նախագծող ընկերություն, որը հաղթել է մրցույթում և կսկսի նախագծել: Այստեղ մնում է, որ կառավարությունը նույնպես կանգնած լինի մեր կողքին»,- նկատել է քաղաքապետը:

 Միջոցառման մասնակիցները մետրոպոլիտենի հետ չորս տասնամյակ ճանապարհ անցած մասնագետներ են, մարդիկ, ովքեր մասնակցել են մետրոյի կառուցման ու շահագործման գործին: Մետրոպոլիտենի 40-ամյակի առթիվ Երևանի քաղաքապետը ոսկե մեդալով պարգևատրեց մետրոպոլիտենի «Երթևեկություն» մասնաճյուղի «Գարեգին Նժդեհի հրապարակ» ստորգետնյա կայարանի կայարանապետ Ռուզաննա Դավթյանին, «Էլեկտրագնացքների շահագործում և նորոգում» մասնաճյուղի շահագործման արտադրամասի մեքենավար հրահանգիչ Զուլումաթ Բարսեղյանին, տեխնոլոգիական, տնտեսական գնացքների հիմնանորոգման ուղեմասի պետ Ավետիք Գրիգորյանին և «Էլեկտրամատակարարում» մասնաճյուղի կարգավարական կետի և տեխնիկական շտապօգնության ուղեմասի պետ Ավետիք Գրիգորյանին: Մետրոպոլիտենի մի շարք աշխատակիցներ էլ արժանացել են Երևանի քաղաքապետի պատվոգրերի և շնորհակալագրերի:

 «Այս թվի մեջ՝ 40 տարի, շատ բան է ասված, շատ բան է պարունակում այս թիվը. երկար տարիների դժվար աշխատանք՝ պահպանելու այն մեծ ներդրումը, որը կատարվել է: Ինքս կարող եմ փաստել, լինելով աշխարհի տարբեր մետրոպոլիտեններում, որ մեր մետրոն իսկապես շատ գեղեցիկ է և շատ մաքուր: Շատ առաջադեմ պետությունների մայրաքաղաքների մետրոպոլիտեններն այսպես մաքուր չեն և չեն կարողանում այսպես մաքուր պահել, իսկ մենք կարողանում ենք: Սա ձե՛ր շնորհքն է: Բոլորիդ շնորհակալություն եմ հայտնում աշխատանքի համար», - նշել է քաղաքապետը: