«Զինված ուժերը պետք է զերծ լինեն ցանկացած քաղաքական գործընթացներից և որդեգրեն քաղաքական զսպվածություն, ինչի ականատեսը մենք չենք եղել»,- «Հայաստանում ինստիտուցիոնալ ճգնաժամի լուծման իրավա-քաղաքական ուղիները» թեմայով քննարկման ժամանակ ասաց  «Իմ քայլը» խմբակցության պատգամավոր Նազելի Բաղդասարյանը։

Նրա խոսքով՝ պետք է լինի միասնական մոտեցում

«Քանի որ ՀՀ-ում իշխանությունը պատկանում է ժողովրդին, ուրեմն ցանկացած հարցի հանգուցալուծումը պետք է լինի ժողովրդի ուղիղ կամարտահայտման միջոցով։ Մենք՝ ոչ առաջին անգամ, առաջարկում ենք քաղաքական բոլոր ուժերին՝ խորհրդարանական ընդդիմությանը, արտախորհրդարանական ընդդիմությանը, և այն քաղաքական ուժերին, որոնք այս պահին գոնե գտնվում են չեզոք դիրքերում, գալ քաղաքական քննարկումների և ձևավորել այն օրակարգը, որով ՀՀ-ն շարժվելու է առաջ։ Սա կարևոր թեզ է մեզ համար»,-ասաց նա։

Նա նշում է, որ  ստեղծված իրավիճակում պրոցեսներն ավելի էր  էսկալացնում  Գլխավոր շտաբի հայտարարությունը, որը նրա խոսքով  քաղաքական հստակ երանգներ էր պարունակում, սակայն զինված ուժերը պետք է զերծ լինեն ցանկացած քաղաքական գործընթացներից և որդեգրեն քաղաքական զսպվածություն, ինչի ականատեսը մենք չենք եղել։

«Լուսավոր Հայաստան» խմբակցության պատգամավոր Կարեն Սիմոնյանի կարծիքով Գլխավոր շտաբի հայտարարությունը քաղաքական չի եղել, այլ  միտված էր որևէ կերպ կասեցնել այն գործընթացը, որը սկսել է կառավարությունը՝ կազմալուծելու բանակի ղեկավար կազմը, ինչին նրա խոսքով  այսօր ականատես ենք լինում։

«Իշխանությունն ուզում է ևս մեկ կառույց հեղինակազրկել։ Այս պահի դրությամբ երևի չի մնացել մի ինստիտուտ կամ կառույց, որին իշխանությունը առնչված չլինեն կամ որևիցե ձևով հեղինակազրկած չլինեն։ Հերթը հասել է բանակին, որոնց վրա ուզում էր իր մեղքը բարդել»,-ասաց նա։

Նրա խոսքով՝ այն իշխանությունը, որը զիջել է Արցախը, չի կարող մնալ իշխանություն։

Հիշեցնենք,  որ նախագահ Արմեն Սարգսյանը երկրորդ անգամ չստորագրեց Զինված ուժերի Գլխավոր շտաբի պետ Օնիկ Գասպարյանին պաշտոնից ազատելու հրամանագիրը և որոշեց «Զինվորական ծառայության և զինծառայողի կարգավիճակի մասին» օրենքի վերաբերյալ դիմել ՍԴ: Փորձագետերի կարծիքով, ՍԴ դիմելու գործընթացը խոչընդոտ չի հանդիսանում ԳՇ պետի պաշտոնից ազատման հարցում։

Սահմանադրական իրավունքի մասնագետ Արտաշես Խալաթյանը նշում է, որ նախագահը հանգել է շատ ճիշտ եզրակացության, քանի որ ըստ էության այստեղ կա օրենքի և սահմանադրության հակասություն․ «Նա նախընտրել է չստորագրել այդ հրամանագիրը, որը փաստացի ավելի շատ կարող ենք քաղաքական ակտ համարել»,- ասաց նա։

Նազելի Բաղդասարյանի խոսքով՝  պետք է քաղաքական կոնսենսուս այս ճգնաժամի հանգուցալուծման հարցում․ «Պետք չէ կազմաքանդել պետական ինստիտուտները և կարիք չկա, որ պետական ինստիտուտները, որոնք լինելով սահմանադրական մարմիններ, ունեն առաքելություն չեզոքություն պահպանելու, միջամտեն քաղաքականությանը։ Քաղաքական զսպվածությունն իրենց պարտականությունն է և պետք է նման սահմանադրական մարմինները մնան իրենց առաքելությունների շրջանակում»,-ասաց նա։

Մանրամասները՝ տեսանյութում։