Հայաստանի հավաքականի ավագ Հենրիխ Մխիթարյանը այսօր նշում է ծննդյան 32-ամյակը
Աջակցիր «Ա1+»-ինՀայաստանի ֆուտբոլի հավաքականի և Հռոմի «Ռոմայի» կիսապաշտպան Հենրիխ Մխիթարյանն այսօր տոնում է իր ծննդյան 32-ամյակը:
Նա ծնվել է 1989 թվականի հունվարի 21-ին, Երևանում, սակայն կյանքի առաջին տարիներն անցկացրել է Ֆրանսիայում, քանի որ հայրը՝ Համլետ Հաբեթնակի Մխիթարյանը, ով Երևանի «Արարատի» ֆուտբոլիստ էր, 1990-ականներին հանդես է եկել ֆրանսիական թիմերում։ Հոր անժամանակ մահից հետո Հենրիխ Մխիթարյանը ընտանիքի հետ Ֆրանսիայից վերադարձել է Հայաստան: Նա փոքր տարիքից երազել է դառնալ ֆուտբոլիստ, ինչպես իր հայրը, և հասել է իր նպատակին:
Հենրիխ Մխիթարյանը ֆուտբոլային առաջին քայլերը կատարել է Երևանի «Փյունիկում»: Այնուհետև հանդես է եկել Դոնեցկի «Մետալուրգ» և «Շախտյոր» թիմերում: 2013 թվականին տեղափոխվել է Դորտմունդի «Բորուսիա»՝ դառնալով Գերմանիայի Բունդեսլիգայում հանդես եկող առաջին հայաստանցի ֆուտբոիստը:
2016 թվականի ամռանը տեղափոխվել է անգլիական «Մանչեսթեր Յունայթեդ», որի հետ 2017-ին դարձել է Եվրոպայի լիգայի հաղթող և դարձել Հայաստանի առաջին ներկայացուցիչը ՈՒԵՖԱ-ի հազարավոր գավաթակիրների շարքում:
2018 թվականի հունվարի 22-ին նա 4 տարվա պայմանագիր է կնքել Լոնդոնի «Արսենալի» հետ: 2019 թվականի սեպտեմբերի սկզբից վարձավճարով հանդես է գալիս Հռոմի «Ռոմայում»:
Հներիխ Մխիթարյանը Հայաստանի ազգային և երիտասարդական հավաքականների լավագույն ռմբարկուն է: Նա անցած տարի 10-րդ անգամ ճանաչվել է Հայաստանի լավագույն ֆուտբոլիստ:
2012թ Երևանի պատվավոր քաղաքացի է, 2016թ նոյեմբերից՝ ՅՈՒՆԻՍԵՖ-ի բարի կամքի դեսպանն է Հայաստանում:
«Ա1+» հեռուստաընկերությունը շնորհավորում է Հենրիխ Մխիթարյանին և մաղթում նորանոր նվաճումներ կարիերայում:
