Ակնհայտ է, որ տնտեսական ճգնաժամը բավականին խորն է. Արկադի Խաչատրյան (տեսանյութ)
Աջակցիր «Ա1+»-ինՀարյուրավոր հարցեր կան՝ կապված համավարակի տարածման, կանխարգելման եւ բուժման արդյունավետության, մարդու իրավունքների սահմանափակման, հետեւանքների վերացման կամ մեղմման գործողությունների արդյունավետության հետ կապված: Այս մասին ԱԺ-ում լրագրողների հետ զրույցում նշեց ԱԺ «Լուսավոր Հայաստան» խմբակցության պատգամավոր, Ֆինանսավարկային եւ բյուջետային հարցերի հանձնաժողովի նախագահ Արկադի Խաչատրյանը՝ անդրադառնալով կորոնավիրուսի հարցով քննիչ հանձնաժողով ձեւավորելու հարցին:
Խաչատրյանը գլխավորելու է քննիչ հանձնաժողովը, որն ուսումնասիրելու է կորոնավիրուսի տարածման հանգամանքները:
Խաչատրյանի պնդմամբ՝ կարեւոր է նաեւ, որ որոշումները ճիշտ ժամանակին կայացվեն, որովհետեւ եթե անգամ ճիշտ որոշումն ուշ է կայացվում, դա ունենում է տնտեսական գին, երբեմն նաեւ մարդկային կյանքեր է արժենում.
«Այս հարցերի պատասխաններն ստանալուց հետո նոր միայն հանձնաժողովը կկարողանա եզրահանգումներ անել: Ուսումնասիրության առարկա պետք է դառնան սուբյեկտիվ հարցեր, թե որ դեպքերում մենք կարող էինք ավելի արդյունավետ գործել, և ինչպիսի խնդիրների է բախվել առողջապահական և որոշումների ընդունման համակարգը»,- ընդգծեց Խաչատրյանը:
Պատգամավորն ընդգծեց՝ քննիչ հանձնաժողովը կգնահատի՝ կորոնավիրուսի դեմ պայքարը որ մասերով է տապալվել.
Ինչ վերաբերում է տնտեսական իրավիճակին, Խաչատրյանի համոզմամբ՝ ակնհայտ է, որ տնտեսական ճգնաժամը բավականին խորն է, ինչը պայմանավորված է ինչպես կորոնավիրուսով, այնպես էլ հետպատերազմյան իրադարձություններով.
«Սոցիալական բեռը պետության համար ավելացել է: Դա էր պատճառը, որ մենք կարծում ենք, որ 2021-ի բյուջեն պետք է վերանայվի, առհասարակ նոր նախագիծ պետք է ներկայացվի: Մարտահրավերները շատ են, լուծումը երկրի նոր անվտանգային ռազմավարության մշակման մեջ պետք է լինի, որը կնախատեսի ինչպես ՀՀ պաշտպանության ռազմավարությունը, նաեւ տնտեսական, սոցիալական բաղադրիչները: Լուծումը տնտեսության արդիականացնումն է եւ որակական շեշտադրումները, որովհետեւ տեխնոլոգիական վերազինումը, կրթական բարեփոխումներն այլընտրանք չունեն»,-ասաց նա:
Ինչ վերաբերում է հրատապ լուծումներին, Խաչատրյանն ասում է՝ արդեն երկու ամիս անցել է, կառավարությունը պետք է շատ լուրջ քայլեր կատարեր նոր անվտանգային ռազմավարության մշակման համար, սակայն այդ ամենը ածանցյալ է նաեւ անվտանգային խնդիրներից.
«Թիվ մեկ հարցը, որ մեր հասարակությանը հուզում է, գերիների վերադարձի հարցն է, նաեւ բազմաթիվ ընտանիքներ սպասում են մեր նահատակված հերոսների աճյուններին: Հետեւաբար կարծում եմ, որ անվտանգային խնդիրներից ածանցվող հարցեր են սրանք: Նաեւ առկա է քաղաքական ճգնաժամի հաղթահարման հարցը, առանց քաղաքական կայուն միջավայրի հնարավոր չէ գլոբալ շատ խնդիրներ լուծել այս պահին»,-նշեց Խաչատրյանը՝ շեշտելով նոր անվտանգային ռազմավարության անհրաժեշտության մասին: