«Հայ ժողովուրդը երկրորդ անգամ մեծ ողբերգություն ապրեց». Սմբատ Լպուտյան
Աջակցիր «Ա1+»-ինՇախմատի օլիմպիական չեմպիոն, Հայաստանի շախմատի ֆեդերացիայի նախագահի տեղակալ, գրոսմայստեր Սմբատ Լպուտյանը կարծում է, որ այս օրերին ոչ մի հայ չպետք է անտարբեր մնա այս օրերին Հայաստանում և Արցախում տեղի ունեցող իրադարձությունների նկատմամբ:
«1915թ եղեռնից հետո հայ ժողովորդը երկրորդ անգամ մեծ ողբերգություն ապրեց վերջին օրերին: Մենք իրավունք չունենք Արցախը հանձնելու: Պետք է ամեն ինչ անենք և փորձենք փոխել իրավիճակը: Հուսանք, որ կգա մի դրություն և Աստծու օգնությամբ կկարողանանք հասնել դրան», - «Ա1+»-ի թղթակցին ասաց անվանի շախմատիստը, ով ներկա էր այսօր Մատենադարանի մոտ 17 կուսակցությունների կողմից կազմակերպած բողոքի ակցիային:
Մեր այն հարցին, թե ինչպե՞ս է պատկերացնում Արցախի հարցի լուծումը, Սմբատ Լպուտյանն ասաց.
«Շախմատ խաղալիս ինքդ տեսնում ես, թե ինչ իրավիճակ է և կայացնում ես համապատասխան որոշում: Տվյալ դեպքում մենք շատ ինֆորմացիա չունենք, ուստի առայժմ կարծիք չենք կարող հայտնել: Բայց մի բան գիտեմ, որ շախմատում երբ ամենադժվար վիճակում ես լինում, դու փորձում ես պայքարել և դուրս գալ այդ դրությունից: Ցանկացած իրավիճակում էլ կարելի է պայքարել և լուծել խնդիրը», - նշեց փորձառու գրոսմայստերը:
Սմբատ Լպուտյանը գտնում է, որ հայ-ադրբեջանական այս «պարտիան» դեռ չի ավարտվել, քանի որ, շախմատի լեզվով ասած, կողմերը ոչ-ոքի չեն խաղացել և չեն կնքել վերջնական հաշտություն:
