Ինչպե՞ս Հայաստանի տնտեսության վրա կանդրադառնա թուրքական ապրանքների արգելքը (տեսանյութ)

8 ամսվա կտրվածքով 13 տոկոսով կրճատվել է Թուրքիայից Հայաստան եկող ապրանքների քանակը, որն առաջիկա 2 ամսում կշարունակվի կրճատվել:

Տնտեսագետ Վահագն Խաչատրյանի խոսքով՝ այս ամենը պայմանավորված է կորոնավիրուսի հետևանքներով։

Կառավարության այն որոշումը, որով կարգելվի թուրքական ապրանքների վաճառքը, Վահագն Խաչատրյանի կարծիքով,  քաղաքական է, քանի որ տնտեսական հիմնավորում ըստ էության չկա։

Թուրքիայից Հայաստան ներմուծվում է 875 անուն ապրանք՝ գյուղատնտեսական ապրանքներից մինչև արդյունաբերական։

Կան ապրանքատեսակներ, որոնց Հայաստան չգալը ըստ նրա,  կարող է խնդիրներ առաջացնել․

«Շինարարական և հումքի ապրանքներ կան, որոնց բացակայությունը կազդի թեթև արդյունաբերության զարգացման վրա»,-նշեց նա։

Վահագն Խաչատրյանի խոսքով՝ Հայաստանը կարող է մտնել Սաուդյան Արաբիայի շուկա, որն,  ի դեպ,  որոշում է ընդունել խզել Թուրքիայի հետ բոլոր բիզնես հարաբերությունները․

«Սա այլընտրանքային տարբերակներից մեկն է, որտեղ հենց մեր արտաքին դիվանագիտական կորպուսը անելիք ունի, որպեսզի մենք կարողանանք թուրքական ապրանքների բոյկոտելու հանգամանքը լրացնել»,-ասում է նա։

Նա նշում է, որ պետք է մտածել՝  ինչ անել այն գործարարների, տնտեսվարողների հետ, որոնք իրենց գործունեությունը կապում էին Թուրքիայի հետ։