«ՀԱՅ արտադրողը ՀԱՅ զինվորի կողքին» (տեսանյութ)
Աջակցիր «Ա1+»-ինԱրդեն մի քանի օր է, ինչ ֆեյսբուքում «ՀԱՅ արտադրողը ՀԱՅ զինվորի կողքին» նախաձեռնությունը իրականացնում է ակցիա՝ տրամադրելով հարթակ այն հայ արտադրողներին, ովքեր պատրաստ են վաճառել իրենց ապրանքը ինքնարժեքին մոտ գնով՝ հասույթը փոխանցելով «Հայաստան» համահայկական հիմնադրամին։
Նախաձեռնության հիմնադիր Ֆլորա Վարդանյանի խոսքով՝ մասնակցությունը շատ հեշտ է:
«Արտադրողները մեզ ուղարկում են իրենց արտադրանքից այն նմուշները, որոնք պատրաստ են տրամադրել այդ նպատակին ծառայելու համար, և մենք պատրաստում ենք միանման նկարներ ու տեղադրում ենք մեր էջում՝ հատուկ բացված տարածքում»,- ասում է նա։
Ինչպե՞ս է կատարվում այս գործընթացը․
Գնորդը ընտրում է այն ապրանքը, որը դեռ վաճառված չէ, նշված գումարը որոշակի գրությամբ փոխանցում է հիմնադրամ, կտրոնը ներկայացնում «Հայկական Ապրանքանիշ»-ին և ստանում իր ապրանքը։
Այս նախաձեռնությանը միացել են բազմաթիվ և բազմաբնույթ ապրանքանիշներ, որոնք արդեն մեծ վաճառք են իրականացրել։
Կազմակերպիչները նշում են, որ այս ամենը նաև աջակցում է արտադրողներին, քանի որ նրանք ստանում են ճանաչելիություն։
Նրանց խոսքով՝ մարդիկ ավելի հասանելի գնով ձեռք բերելով արտադրանքը, հետագայում կդառնա նրանց հաճախորդը։
Այս առցանց հարթակը հնարավորություն է տալիս նաև վաճառք իրականացնել մարզից մարզ՝ փոստային տարբերակով։
