Ռուսաստանը ՀԱՊԿ շրջանակներում պարտավորություններ ունի Հայաստանի, բայց ոչ Ղարաբաղի առջեւ. Պեսկով
Աջակցիր «Ա1+»-ինՌուսաստանը, կատարելով Հավաքական անվտանգության պայմանագրի կազմակերպության շրջանակներում պարտավորությունները, կարող է կանգնել Հայաստանի կողքին, սակայն այդ պարտավորությունները չեն տարածվում Լեռնային Ղարաբաղի վրա: Նման հայտարարություն է արել ՌԴ նախագահ Վլադիմիր Պուտինի խոսնակ Դմիտրի Պեսկովը:
ТАСС-ի փոխանցմամբ՝ նա նշել է.
«Անվտանգության ապահովման առումով պարտավորությունները. եթե ՀԱՊԿ անդամ երկիրը որեւէ ագրեսիայի, արտաքինից հարձակման է ենթարկվում, ապա այդ դեպքում պայմանագրի մասնակից երկրները պարտավոր են պաշտպանել տվյալ պետությանը»:
Պատասխանելով հարցին, թե որ դեպքում Ռուսաստանը պատրաստ կլինի զինվորականների ուղարկել ԼՂ հակամարտության գոտի, Պեսկովը նշել է, որ դա «չի բխում ՀԱՊԿ շրջանակներում պարտավորություններից»:
«Տվյալ դեպքում խոսքը Հայաստանի մասին է, ՌԴ նախագահ Պուտինը հստակ պարզաբանել է եւ սահմանազատել այդ երկու հարցերը, ՀԱՊԿ-ի մասով պարտավորությունները չեն տարածվում Ղարաբաղի վրա»,-պարզաբանել է Պեսկովը:
Նա ասել է, որ տեղեկությունները, որ Հայաստանի տարածքում մարտական գործողություններ են ընթանում, չեն հաստատվել:
