Անկախության տոնը նշվել է նաև քրեակատարողական հիմնարկներում
Աջակցիր «Ա1+»-ին1991թ. սեպտեմբերի 21-ի հանրաքվեում Հայաստանի ժողովուրդը ձայների ճնշող մեծամասնությամբ քվեարկեց ԽՍՀՄ-ի կազմից դուրս գալու և անկախ պետություն ստեղծելու օգտին: Այդ օրվանից սեպտեմբերի 21-ը նշվում է որպես Անկախության տոն: Այս տարի լրացավ մեր անկախ Հանրապետության 29-ամյակը, որը տարբեր միջոցառումներով նշվեց ոչ միայն Հայաստանի Հանրապետությունում, այլև նրա սահմաններից դուրս:
Անկախության տոնը նշվեց նաև անազատության մեջ գտնվող անձանց կողմից: Հայաստանի Հանրապետության արդարադատության նախարարության քրեակատարողական հիմնարկներում, պահպանելով հակահամաճարակային անվտանգության համապատասխան կանոնները, կազմակերպվել էին տոնին նվիրված տարբեր միջոցառումներ՝ սպորտային, մշակութային, երաժշտական:
Մասնավորապես «Վանաձոր» ՔԿՀ-ի գրադարանում սոցիալական, հոգեբանական և իրավական աշխատանքների բաժնի աջակցությամբ կազմակերպվել էր ստեղծագործող դատապարտյալների աշխատանքների ցուցադրման տաղավար՝ նվիրված Հայաստանի Հանրապետության անկախության 29-ամյակին: Ներկայացվել էին հատկապես դատապարտյալ Ռաֆիկ Հախվերդյանի ստեղծագործական աշխատանքները` նկարների ձևավորմամբ հուշանվերների պատրաստում: Ռ. Հախվերդյանն իր իսկ նախաձեռնությամբ ցուցադրված աշխատանքները նվիրաբերելու է վարչական տարածքում առկա բաց ցուցահանդես-տաղավարին:
«Սևան» ՔԿՀ-ում Անկախության տոնին նվիրված կազմակերպվել էր սպորտային շաբաթ՝ մարզային տարբեր խաղերով՝ ֆուտբոլ, շախմատ, բիլիարդ, ձեռքի ուժ և այլ սպորտաձևեր:
«Աշխարհի հայտնի կանայք» թեմայով «Աբովյան» ՔԿՀ-ում հիմնարկի սոցիալական, հոգեբանական և իրավական աշխատանքների բաժնի աջակցությամբ և «Ինքնագործ մշակութային միավորման» խմբի կին դատապարտյալների մասնակցությամբ անցկացվել էր թեմատիկ քննարկում, որից հետո տոնական տրամադրությունը շարունակվել էր դահլիճում․ ազատազրկված կանայք ազգագրական երգ ու պարով, ասմունքով շնորհավորեցին Անկախության 29-ամյակը:
ՀՀ ԱՆ քրեակատարողական ծառայության
հանրային կապերի բաժին