Արմավիրի մարզի Եղեգնուտ համայնքի բնակիչները   կառավարության դիմաց էին։ Նրանք դեմ են, որ նախկին համայնքապետը, ով ղեկավարել է գյուղը շուրջ 34 տարի, վերադառնա ու շարունակի աշխատել։

Ավագանու անդամ Անտոն Խուրշուդյանը լրագրողների հետ զրույցում պատմեց, որ երկու տարի առաջ համայնքում ակցիա են իրականացրել, որի հետևանքով համայնքի ղեկավար Ռազմիկ Մարգարյանն իր դիմումի համաձայն լքել է պաշտոնը, համայնքի ղեկավարի ժամանակավոր պաշտոնակատար ընտրվելուց հետո նախկին համայնքապետը դիմել է Առաջին ատյանի դատարան, որպեսզի իր հրաժարականի դիմումը չեղարկվի և իր պաշտոնին վերադառնա, սակայն  դիմումը մերժվել է, քանի որ առկա է եղել մարզպետի որոշում։

Այս ամենից հետո Ռազմիկ Մարգարյանը  դիմել է Վերաքննիչ դատարան, որը դիմումը բավարարել է մասնակի, որից հետո դիմել է Վճռաբեկ դատարան:

Բնակիչներն ասում  են՝ համայնքապետն վերցրել է գյուղում գտնվող դեղատան  տարածքն  ու  ասում է, որ ինքն  է գյուղապետը, թղթեր է ստորագրում, կնիքներ է տալիս. «Ոչ ոք չգիտի, թե այդ լիազորությունները որտեղից են իրեն հասել»,-ասում են Եղեգնուտ համայնքի բնակիչները:

Ակցիա իրականացնողներն ասում են՝ շատերին են դիմել, սակայն ոչ մեկ իրենց հստակ պատասխան չի տվել. «Հիմա միայն վարչապետ Նիկոլ Փաշինյանը կարող է մեր խնդիրը լուծել, մենք վստահում ենք իրեն»,-ասում են նրանք։

Որոշ ժամանակ անց բողոքի ակցիա անցկացնողներից 3-ին հրավիրեցին ներս՝ վարչապետի օգնական Նաիրի Սարգսյանի հետ հանդիպման. «Վարչապետը մեզ խոսք ունի և մենք երեք մասնակիցներով  կհանդիպենք նրա օգնականի հետ և դուրս կգանք՝ ներկայացնելու մեր տպավորությունները»,- ասաց ակցիայի մասնակիցներից մեկը:

Մոտ կես ժամ հանդիպումից հետո մասնակիցներից մեկից տեղեկացանք, որ քննարկման ժամանակ ամբողջովին ներկայացվել է խնդիրը, իրավաբանը ևս ներս է հրավիրվել, ով  ներկայացրել է, որ Եղեգնուտի նախկին համայնքապետը չի կարող ոչ մի րոպե պաշտոնավարել, նրա կատարած բոլոր գործողությունները ոչ իրավական են. «Հիմա մենք սպասում ենք երկրորդ փուլին, կլինի նաև Տարածքային կառավարման նախարարության ներքին իրավաբանական վարչության խորհրդատվությունը, որից հետո մոտ 1-2 ժամվա ընթացքում մենք կունենանք վերջնական պատասխան»,- ասաց նա:

Նշենք նաև, որ ակցիայի մասնակիցների թվում կան մանկահասակ երեխաներ։