«Հասարակ ՀՀ քաղաքացիներ ենք, ովքեր ցանկանում են ազատ տեղաշարժ». բողոքի ակցիա կառավարության դիմաց (տեսանյութ)
Աջակցիր «Ա1+»-ինԿառավարության մոտ արդեն տևական ժամանակ բողոքի ակցիա են իրականացնում ՀՀ այն քաղաքացիները, ովքեր ցանկանում են մեկնել Ռուսաստանի Դաշնություն։ Նրանք պնդում են, որ այստեղ աշխատանք չունեն: Բացի այդ՝ նշում են, որ շատերն իրենց ընտանիքներին թողել են այնտեղ։
Քաղաքացիները պահանջում են հանդիպում վարչապետի կամ փոխվարչապետի հետ։ Մեր դիտարկմանը, թե Կառավարությունից հորդորում են մնալ մեր երկրում, հիմնվել և աշխատել այստեղ, հավաքված քաղաքացիներից Արթուր Ոսկանյանն արձագանքեց, թե չեն կարող ապրել 100-120 հազար դրամ աշխատավարձով։ Համապատասխան պայմանների դեպքում պատրաստ են մնալ և շարունակել ապրել այստեղ։
Հավաքվածներից մի կին նշեց՝ ուզում է գնալ, ամուսնուն և տղային տեսնել, քանի որ տևական ժամանակ չի տեսել։
Արթուր Ոսկանյանի խոսքով՝ իրենց մոտ 3000 քաղաքացի է դիմել, ովքեր այս պահին սպասում են սահմանների բացվելուն։ Նրանց համար որեւէ տարբերություն չկա՝ ցամաքային, թե օդային սահմանով կմեկնեն:
«Մենք հասարակ ՀՀ քաղաքացիներ ենք, ովքեր ցանկանում են ազատ տեղաշարժ»,- նշեց Ոսկանյանը։
Քաղաքացիները կառավարության մոտ են եկել վարչապետ Նիկոլ Փաշինյանի և ՌԴ նախագահ Վլադիմիր Պուտինի լուսանկարով և գրություններով, թե պահանջում են բանակցել Ռուսաստանի հետ։