«Ահավոր ծանր ու անելանելի պայմաններում են»․ մի քանի տասնյակ անձինք 20 օր է՝ գիշերում են Բագրատաշենի անցակետում
Աջակցիր «Ա1+»-ինԱզգությամբ հայ, սակայն Ռուսաստանի Դաշնության քաղաքացի հանդիսացող մի քանի տասնյակ անձինք արդեն 20 օր է՝ գիշերում են Բագրատաշենի անցակետում՝ բաց երկնքի տակ։
Այս մասին «Ա1+»-ին հայտնեց նրանց հետ անցակետում գտնվող քաղաքացիներից մեկը՝ պնդելով, որ հետ գալու մտադրություն չունեն, սակայն շատ ծանր պայմաններում են․
«Մարդիկ ապրում են ահավոր ծանր ու անելանելի պայմաններում, մեծամասնությունը մեքենաները ուղարկել է ՌԴ՝ հուսալով, որ միջանցք կբացվի, կգնանք, իսկ այստեղ մնացել է մի 3-4 մեքենա։ Մարդիկ սկամեյկաների վրա են քնում, գումար էլ չունեն արդեն, ապրելու հնարավորություն չունենք՝ ո՛չ ֆիզիկապես, ո՛չ հոգեպես»։
Քաղաքացին ասում է՝ իրենց մեջ կա նաև հղի կին, ով ևս անելանելի վիճակում է։
Բագրատաշենի անցակետում գտնվող քաղաքացիները Հայաստանում Ռուսաստանի դեսպանատնից ստացել են արձագանք, որը, սակայն, նրանց չի հուսադրել․
«Նամակի բնույթը այն էր, որ հանգստացեք, խուճապի մի մատնվեք, մենք կփորձենք դիվանագիտական կապեր ստեղծել Վրաստանի հետ, այսքանը, բայց ինչ-որ հուսադրող պատասխան մեզ չեն տալիս»։
Քաղաքացին ասում է՝ իրենք համաձայն են հասնել Ռուսաստան ցանկացած տարբերակով։
Հիշեցնենք, որ ՀՀ-ում Ռուսաստանի դեսպանատան մոտ դեռ հուլիսի 24-ին անցակացրած բողոքի ակցիայի ընթացքում քաղաքացիները ասել էին՝ եթե իրենց խնդրին լուծում չտրվի, կտեղափոխվեն անցակետ և հուլիսի 30-ին տեղափոխվել էին այնտեղ գիշերելու։
