Ինչ անել, որ կողմնակի անձինք Վեդիի աղբավայր չմտնեն
Աջակցիր «Ա1+»-ինԱմեն օր ծուխ է բարձրանում Վեդիի աղբավայրից։ Բնակիչները ենթադրում են՝ այս կերպ ոչնչացվում է աղբը։
Վեդի քաղաքում աղբահանությամբ զբաղվող «Մաքուր երկիր» ՍՊԸ-ի տնօրեն Յուրա Հարությունյանը վստահեցնում է՝ աղբը իրենք չեն այրում։ Ըստ նրա՝ այս տարի երկու անգամ է հրդեհ բռնկվել, իսկ ծուխն անընդհատ է, քանի որ հանգցնելու աշխատանքներն են երկար տեւում․ «Իրականում տարածքը մեծ է ու օրեր են պետք դրանք հանգցնելու համար, դրա համար էլ բնակչության մոտ այն կարծիքն է, որ մենք վառում ենք աղբը»։
Յուրա Հարությունյանն ասում է՝ այս տարի երկու անգամ աղբավայրում հրդեհ է բռնկվել․ «Առաջին անգամ կրակը բռնկվել է աղբի հետ եկած կրակի կտորներից։ Վերահսկելը մի փոքր դժվար է։ Երկրորդը բոլորովին անհայտ պայմաններում է եղել, իմ անձնական կարծիքով՝ այստեղ մարդկային գործոն է եղել»։
Վեդու աղբավայրը չունի հսկիչ, իսկ տարածքը մասամբ է ցանկապատված, եղած ցանկապատներն էլ, ըստ «Ա1+»-ի զրուցակցի, հրդեհների հետևանքով վնասվել են։
Վեդիի աղբավայրը բնակելի տարածքից ընդամենը 5 կմ հեռավորությամբ է։ Շաբաթվա ընթացքում 5 օր՝ օրական մոտ 15 տոննա աղբ է թափվում այնտեղ, որի կեսը դառնում է մոխիր: Չնայած աղբի այրումը կրճատում է աղբի 60-70 տոկոսը, սակայն դա առկա խնդրի նպատակահարմար լուծում չէ։
Խնդիրն իսկապես առկա է և անհանգստացնում է ոչ միայն բնակիչներին, այլև բոլորին,- ասում է Վեդու համայնքապետ Վարուժան Բարսեղյանը։
«Ամբողջ խնդիրը նրանում է, որ մենք սպասում ենք գործարանի շահագործկմանը, որը սարերի հետևում չի։ Գործարանի աշխատանքը հնարավորություն կտա աղբի տեսակավորման արդյունքում խտացնել և վերացնել աղբի նմանատիպ կուտակումներն ու այրումները»,- ասում է նա։
Վեդիում աղբի տեսակավորման գործարանի աշխատանքների իրականացումը սկսվել է 2013-ից․ ՄԱԿ-ի կողմից տրամադրվել է 45.000 դոլարին համարժեք դրամ․ աշխատանքները շարունակվում են։
«Մաքուր երկիր» ՍՊԸ-ի տնօրեն Յուրա Հարությունյանը վստահ է, որ գործարանը կշահագործվի աշնանը։
Այս պահին նա առաջնային խնդիրը համարում է այն , որ աղբավայր կողմնակի մեքենաներ չմտնեն, եւ կանխարգելիչ միջոցառումներ են անում «Ուղեփակոցն արդեն տեղադրված է, շրջակա տարածքի մաքրման աշխատանքներ ենք նաև կատարում, որովհետև գերեզմանների հարակից տարածքն է դա, կարծում եմ մինչև օգոստոսի կես արդեն կվերջացնենք մաքրման աշխատանքները»,- ասում է Յուրա Հարությունյանը։
Ըստ նրա՝ ներկայիս աղբավայրի տեղում նախատեսվում է այգի տնկել։