Երևանի ընդհանուր իրավասության դատարանում` նախագահությամբ դատավոր Աննա Դանիբեկյանի, շարունակվում է  սահմանադրական կարգի  տապալման գործով քննությունը։

Գործով անցնում են ՀՀ երկրորդ նախագահ Ռոբերտ Քոչարյանը, Սեյրան Օհանյանը, Արմեն Գևորգյանը և Յուրի Խաչատուրովը։ Այսօրվա դատական նիստին ևս նրանք մասնակցում են։

ՀՀ երկրորդ նախագահ Ռոբերտ Քոչարյանի պաշտպաններից Հովհաննես Խուդոյանը Քոչարյանի գույքի վրա դրված կալանքը վերացնելու մասին միջնորդություն ներկայացրեց դատարանին։

 Պաշտպանը նախ հիշեցրեց, որ Ռ.Քոչարյանի գույքն ամբողջությամբ կալանքի տակ է դրվել 2018 թ. հուլիսի 30-ին՝ դատարանի որոշմամբ, իսկ դա այն ժամանակ էր, երբ Քոչարյանի նկատմամբ դեռևս  մեղադրանք չէր առաջադրվել: 

Խուդոյանը նաև հիշեցրեց, որ դեռևս 2018 թվականի հոկտեմբերին Երևան քաղաքի ընդհանոր իրավասության դատարան ներկայացրած իրենց դիմումի հիման վրա  դատավորը, քննելով բացառապես գույքի վրա դրված կալանքի հարցը, արձանագրել էր, որ Ռոբերտ Քոչարյանի իրավունքները խախտվել են։ Փաստաբանի խոսքով՝ այս փաստը վերահաստատել է նաև Վերաքննիչ քրեական դատարանը։

Խուդոյանի պնդմամբ շուրջ մեկ տարի խախված իրավունքները պետք է վերականգնվեին, մինչդեռ, ըստ նրա, Դանիբեկյանը  հենց առաջին դատական նիստի օրը պետք է այս հարցը քննարկման առարկա դարձներ, քանի որ առկա է խախտված իրավունքների հանգամանք․

«Մենք Ձեզ խնդրում ենք, որ արձանագրելուց զատ՝ նաև միջոցներ ձեռնարկեք, որպեսզի այդ խախտված իրավունքների հետևանքները պարոն Քոչարյանն այլևս չկրի»։

Խուդոյանը նշեց, որ  շատ մանրամասն չի ներկայացնի միջնորդությունը, քանի որ  դրանում առկա իրավական հիմնավորումները մեկ անգամ արդեն ամբողջությամբ դատարանը լսել է և արձանագրել իրավունքների խախտումը։

Նշենք, որ  «Մարտի 1»-ի գործով ամբաստանյալ Արմեն Գևորգյանի պաշտպան Էրիկ Ալեքսանյանը նույնպես դատարանին միջնորդեց վերացնել իր պաշտպանյալի գույքի նկատմամբ կալանքը:

  Ալեքսանյանը  հիշեցրեց, որ Երևանի ընդհանուր իրավասության դատարանն արձանագրել էր Արմեն Գևորգյանի իրավունքների խախտում, սակայն չէր պարտավորեցրել վարույթն իրականացնող մարմնին վերացնել խախտումը: 

Պաշտպանը տեղեկացրեց, որ կալանք է դրված Արմեն Գևորգյանին պատկանող 1 հողամասի և բոլոր հաշվեհամարների վրա, կալանք է դրված նաև նրա մերձավոր ազգականների բնակարանների վրա:  

Նշենք, դատավոր Աննա Դանիբեկյանը  որոշեց ամբաստանյալներ Ռոբերտ Քոչարյանի և Արմեն Գևորգյանի գույքի նկատմամբ կալանքը վերացնելու պաշտպանների միջնորդությունները քննարկել միասին։