Բացել լրահոսը Փակել լրահոսը
կոնգրես
A A
Քաղաքականություն

Հայկական հանձնախմբի կոնգրեսականները փորձում են արգելափակել Ադրբեջանի ռազմական օգնությունը (տեսանյութ)

Ամերիկայի Ձայն

ԱՄՆ Կոնգրեսի հայկական հանձնախմբի կոնգրեսականներն առաջարկում են Պենտագոնի ծրագրերի հատկացման օրինագծում օրենսդրական փոփոխություններ

ԱՄՆ Կոնգրեսի հայկական հանձնախմբի կոնգրեսականներն առաջ են քաշել 2021 թվականի Ազգային պաշտպանության համար հատկացումների օրինագծում (2021 FY National Defense Authorization Act (H.R. 6395) օրենսդրական երկու փոփոխությունների նախագծեր: Դրանք վերաբերվում են ԱՄՆ-ի կողմից «Գործընկերների կարողությունների ամրապնդում» ծրագրի 333-րդ կետով Ադրբեջանին տրամադրվող մոտ 120 միլիոն դոլար ռազմական օգնությանը:

Կոնգրեսական Բրեդ Շերմանն առաջարկել է համար 66 փոփոխությունը, որով օրինագծի շրջանակում Ադրբեջանի համար նախատեսվող ռազմական օգնությունը չպետք է տրամադրվի քանի դեռ ԱՄՆ նախագահը Կոնգրեսին չհավաստիացնի, որ այդ միջոցները չեն սպառնում քաղաքացիական ավիացիային: Հայկական հանձնախմբի մեկ այլ կոնգրեսական՝ համանախագահ Ֆրենք Փալոնն էլ առաջարկում է համար 397 փոփոխությունը, որը կպարտադրի ԱՄՆ պաշտպանության նախարարությանն առանձին զեկույց ներկայացնել «Գործընկերների կարողությունների ամրապնդում» ծրագրի 333-րդ կետով տրամադրվող ամերիկյան ռազմական օգնության մասին:

՛՛Անհրաժեշտ է արձանագրել օգնություն ստացող երկրի մարդու իրավունքների պաշտպանության հետ կապված վիճակը: Եթե որևէ երկիր խախտում է մարդու իրավունքները, ինչպես օրինակ Ադրբեջանը, ապա չպետք է ստանա 333-րդ կետով նախատեսվող ֆինանսավորումը՛՛,- ասում է կոնգրեսական Փալոնը:

Դեռևս մայիսին հայկական հանձնախմբի անդամները բողոքի նամակ էին հղել ԱՄՆ պետքարտուղարին ու պաշտպանության նախարարին Ադրբեջանի օգնության կապակցությամբ՝ նշելով, որ այն խախտում է տարիներ շարունակ հաստատված ռազմական օգնության տրամադրման համաչափությունը: ԱՄՆ պետքարտուղարի տեղակալ Մերի Էլիզաբեթ Թեյլորը պատասխան նամակում, ընդգծելով Վաշինգտոնի համար Բաքվի և Երևանի հետ գործընկերության ամրապնդման կարևորությունը, շեշտել էր, որ Պենտագոնի ռազմական ծրագրերն Ադրբեջանի հետ բխում են ԱՄՆ-ի, Ադրբեջանի և տարածաշրջանի շահերից և նպաստում ահաբեկչության, թմրամիջոցների շրջանառության, զանգվածային ոչնչացման զենքի տարածման կանխարգելմանը: Պետքարտուղարի տեղակալը վստահեցրել է, որ ծրագիրը չի իրականացվում ՀՀ ու Ադրբեջանի սահմանային գոտում, չի նպաստում Ադրբեջանի հարձակողական հնարավորությունների ուժեղացմանը և չի սպառնում Հայաստանին: Այս գնահատականի հետ, սակայն, համակարծիք չեն հայկական հանձնախմբի կոնգրեսականները:

՛՛Եթե նույնիսկ փորձենք պատկերացնել, որ այն չի օգտագործվի հարձակողական նպատակներով, ապա այսպիսով Ադրբեջանը հնարավորություն է ստանում նույնչափ սեփական գումար հատկացնել, օրինակ, Թուրքիայից կամ այլ երկրից հարձակողական զենք գնելու համար՛՛,- ասել է կոնգրեսական Ֆրենք Փալոնը:

Ազգային պաշտպանության համար հատկացումների օրինագծի շուրջ քվեարկությունը Ներկայացուցիչների պալատում նախատեսված է գալիք երկուշաբթի: Պաշտպանության ոլորտի կարևոր այս փաստաթուղթը առնչվում է հաջորդ տարվա Պենտագոնի ծրագրերի և հատկացումների հետ կապված հարցերին: