«Հակառակորդի զինված ուժերի թե ցամաքային և թե օդային սադրանքներին ՀՀ զինված ուժերը պատրաստ են տալ համարժեք հակահարված» (տեսանյութ)
Աջակցիր «Ա1+»-ինԵրեկ կես գիշերից հետո հանգստությունը պահպանվում է, կրակոցներ չկան: Այս մասին այսօր Իջևանի ճգնաժամային կենտրոնում հրավիրված ասուլիսում հայտարարեց Հայկական միասնական տեղեկատվական կենտրոնի ղեկավար Արծրուն Հովհաննիսյանը:
Նրա փոխանցմամբ ընդհանուր առմամբ ՀՀ Զինված ուժերի ՀՕՊ ստորաբաժանումները խոցել են հակառակորդի թվով 13 անօդաչու թռչող սարք (ԱԹՍ), որոնցից 10-ը՝ հարվածային, 3-ը՝ հետախուզական, ինչը Հովհաննիսյանի խոսքով արդյունավետության տեսանկյունից բավականին բարձր ցուցանիշ է:
Նա փաստեց նաև, որ հակառակորդը 5-6 հայկական բնակավայրերի նկատմամբ կիրառել է 50-ից ավելի հրետանային արկ: Հովհաննիսյանը ցույց տվեց արկի մեծ բեկոր:
«Ներկա պահին Տավուշի սահմանաային գոտում պահպանվում է հրադադարի ռեժիմը: Անկախ այս հանգամանքից, հայկական զինված ուժերը գտնվում են բարձր մարտունակության մեջ, զգոն են, տիրապետում են իրավիճակին, հետևում են հակառակոդի ցանկացած գործողության և պատրաստ են ցանկացած սադրանքների` լինի ցամաքային, թե օդային, տեսնում ենք բոլոր շարժերն ու բոլոր գործողությունները»:
Ասուլիսին մասնակցում էր նաև Մարդու իրավունքների պաշտպան Արման Թաթոյանը: Վերջինս ընդգծեց` ՊՆ-ի հետ արդյունավետ համագործակցության մեջ են և իրենց առաջնահերթությունների մեջ է նաև զինծառայողների իրավունքները.
«Մենք այստեղ ենք քաղաքացիական բնակավայրերում մարդկանց իրավունքների հետ կապված, սակայն պետք է ասեմ, որ զինծառայողների իրավունքների հարցերը նույնպես մեր անմիջական ուշադրության ներքո են»:
Մարդու իրավունքների պաշտպանը մտահոգիչ համարեց հատկապես այն, որ հրետակոծվել էր «Տավուշ տեքստիլը», որը արտադրում է բժշկական դիմակներ.
«Միջազգային մարդասիրական նորմերի խախտման մասին է այստեղ արդեն խոսքը գնում։ Ենթադրվում է, որ ադրբեջանական կողմը նախապես իմացել է, որ այդտեղ կա ոչ ռազմավարական օբյեկտ, այն էլ բժշկական կարևորության»։
Թաթոյանը համոզմունք հայտնեց, որ հակառակորդը մտադիր է եղել թիրախային վնաս հասցնել:
Նա նաև տեղեկացրեց, որ վնասների մեծ մասը հասցվել է Այգեպար գյուղին, 11 տուն ենթարկվել է հրետակոծության.
«Խոսքը գնում է այնպիսի արկերի մասին, որոնք պարզապես ներսից պայթում են և բեկորների են վերածվում: Այդ բեկորները կարող են անվերականգնելի վնաս հասցնել մարդկանց»:
Այգեպարում տներից մեկը հրդեհեվել է հենց այդ արկի պատճառով,-ասում է Թաթոյանը և հավելում, որ եթե այդ արկը հարվածեր տան տանիքին, այն ամբողջությամբ փլատակի կվեածեր:
