Եթե կորոնավիրուսի դեմ պատվաստանյութ լինի, հայաստանցիների քանի՞ տոկոսը կպատվաստվի․ ուսումնասիրություն

2020 թ. մայիսին Բրեվիսի կողմից իրականացված «արտակարգ» հետազոտության շրջանակներում փորձել ենք հասկանալ հայաստանցիների տրամադրություններն ու սպասումները՝ կապված նոր կորոնավիրուսի դեմ պատվաստանյութի ստեղծման հետ։ 

Հարցվածների գրեթե կեսը՝ 44%-ը, հավանական է համարել, որ պատվաստանյութը կստեղծվի արդեն այս տարի, մոտ 16%-ը  որպես հավանական ժամկետ նշել է 2021-ը, իսկ ավելի քան 10%-ը կարծիք է հայտնել, որ պատվաստանյութը կստեղծվի 2021-ից հետո։ Կան նաև հոռետեսորեն տրամադրվածներ (9%), որոնք անհավանական են համարում պատվաստանյութի ստեղծումը։

Պատվաստանյութի առկայության դեպքում յուրաքանչյուր 3-րդ հայաստանցի (հարցվածների 32%-ը) չի գնա պատվաստվելու։ Մի փոքր ավելի է նրանց թիվը, ովքեր լիովին հավանական են համարում, որ կպատվաստվեն՝ 36%:

Հետազոտությունը կատարվել է այս տարվա մայիսի 15-25-ն ընկած ժամանակահատվածում, Երևանում և Հայաստանի 10 մարզերում հեռախոսային հարցումների միջոցով 1620 բնակիչների շրջանում։

Հետազոտության մի մասն էլ նվիրված է եղել մեր քաղաքացիների սպասումներին՝ կախված Հայաստանում և աշխարհում նոր կորոնավիրուսի համավարակի կանխման հետ։

Բրեվիս