Բազմանդամ ընտանիքը սոցիալապես ծանր վիճակում է տևական ժամանակ. պատմություն Թեղուտից
Աջակցիր «Ա1+»-ինՄանուչարյանների բազմանդամ ընտանիքն ապրում է Տավուշի մարզի Թեղուտ գյուղում: Ընտանիքը սոցիալական լուրջ խնդիրներ ունի, բայց ի տարբերություն շատերի՝ այս ընտանիքի խնդիրները չեն բաժանվում կորոնավիրոիսից առաջ կամ խնդիրներ վիրուսի պատճառով շրջափուլերի: Մանուչարյանները ապրելու խնդիր ունեն տևական ժամանակ:
Վեց անդամից բաղկացած ընտանիքում բնակվում են երկու անչափահաս երեխաները՝ 9-ամյա Արաքսյան և 7-ամյա Անին: Երեխաների ծնողները, տատիկը և պապիկը չեն աշխատում: Ընտանիքը գոյատևում է պետությունից ստացած նպաստի և թոշակի գումարով, ինչը չի բավարարում բազմանդամ ընտանիքի նույնիսկ առաջնային պահանջմունքներին:
Երեխաների մայրը՝ 31-ամյա Գայանեն «Ա1+»-ին պատմեց, որ ամուսինը՝ Աշոտը 40 տարեկան է, արդեն երկրոդ կարգի հաշմանդամություն ունի, բանակում ականի պայթյունից վիրավորում է ստացել և զրկվել ոտքից:
Երեխաների տատիկը 63 տարեկան է, ունի հիպերտոնիկ ճնշման և անոթային խնդիրներ, Գայանեն ասում է՝ միջոցներ չունեն նույնիսկ նրան բժշկի տանելու համար:
Իսկ Ժորա պապիկը մի քանի ամիս առաջ իշեմիկ ինսուլտ է ստացել, թոշակառու է:
Գայանեն ասում է՝ թեև առողջական խնդիրներ չունի և պատրաստ է աշխատել, բայց գյուղում աշխատելու հնարավորություն չկա:
Թեղուտում, ինչպես Հայաստանի շատ գյուղերում, մարդիկ ապրում են արտագնա աշխատանքով, իսկ հիմա անտառներից սունկ և ուտելի բույսեր են հավաքում և վաճառում:
31-ամյա կնոջ խոսքով ամուսինը ֆիզիկապես ի վիճակի չէ, իսկ ինքը միայնակ անտառ գնալ չի կարող:
Ծնողները կարողացել են նպաստից խնայողություններ կատարել և համակարգիչ գնել, երեխաները այսօր առցանց դասերից հետ չեն մնում:
Գայանեն ասաց՝ դիմել են Թեղուտի գյուղապետին, իրենց խնդիրների մասին տեղյակ պահել, բայց արձագանք դեռ չեն ստացել:
Հիշեցնենք, որ մայիսի 15-ը ընտանիքի միջազգային օրն է:
