«DAROINK»-ի մենեջերի մոտ կորոնավիրուս է հայտնաբերվել․ նա շփում է ունեցել խանութների հետ
Աջակցիր «Ա1+»-ին«DAROINK» (ԴԱՐՈՅՆՔ) քաղցրավենիք արտադրող ձեռնարկությունում կորոնավիրուսով վարակվածության դեպք է արձանագրվել: Տեղեկատվությունը «Ա1+»-ի հետ զրույցում հաստատեց ընկերության տնօրեն Կարապետ Աֆրիկյանը:
Վարակված անձը ընկերության մենեջերն է, ով հիմնականում շփում է ունեցել խանութների հետ, արտադրության հետ շփում չի ունեցել, -ասաց Աֆրիկյանը:
Աշխատակիցը հիվանդանոց է դիմել մարտի 29-ին, վարակվածության փաստը հաստատվել է ապրիլի մեկին,-հայտնեց նա:
«Արտադրամասը ամեն օր 4-5 անգամ ախտահանվում է, մաքրվում է, աշխատողները օրը մի քանի անգամ ջերմաչափվում են»,-ասաց տնօրենը՝ բացառելով, որ արտադրամասում հնարավոր է այլ դեպքեր արձանագրվեն:
«Աշխատակիցներից որևէ մեկը վարակված անձի հետ չի շփվել»,-վստահեցրեց Աֆրիկյանը:
Նաև փոխանցեց, որ արտադրամասը այս պահին չի աշխատում, քանի որ հանգստյան օրեր են, այնտեղ այս պահին կատարվում են ախտահանման աշխատանքներ:
Թե աշխատակիցը որտեղ է վարակվել, պարզ չէ,-հայտնեց նա:
Առողջապահության նախարարությունից դեպքի վերաբերյալ մանրամասներ չհայտնեցին: ԱՆ խոսնակ Ալինա Նիկողոսյանը «Ա1+»-ի հարցադրմանն ի պատասխան նշեց, որ առանձին դեպքերը չեն մեկնաբանում:
