Գնացքով Գյումրի մեկնողների մի մասը՝ առանց դիմակների
Աջակցիր «Ա1+»-ինԵրեւանից Գյումրի՝ գնացքով։ «Ա1+»-ի թղթակիցը փորձել է հասկանալ՝ ինչ կանխարգելիչ միջոցառումներ են իրականացվում երկաթուղիում։ Աշխատակիցները վստահեցրել են՝ «Հարավկովկասյան երկաթուղի»ընկերությունում ձեռնարկվում են կորոնավիրուսի տարածման կանխարգելմանն ուղղված առաջնահերթ միջոցառումներ։
Աշխատակիցների խոսքով` ուղևորների հետ աշխատող անձնակազմը՝ տոմսավաճառները, ուղեկցորդները, կայարանների հերթապահները, մեքենավարները, ապահոված են բժշկական դիմակներով, ձեռնոցներով և ախտահանիչ նյութերով։
Կայարանների տարածքները սիստեմատիկ օդափոխվում են և ախտահանվում հատուկ միջոցներով` քլորով ու սպիրտով։
«Մեզ ղեկավարությունը պարտադրում է կրել ձեռնոցներ ու դիմակներ, ինչպես նաև անընդհատ ախտահանել ձեռքերը»,-ասաց աշխատողներից մեկը։
Գնացք նստելիս ուղևորների հետ աշխատող անձնակազմի ջերմությունը չափվեց, իսկ ուղևորներինը` ոչ։
Երևան-Գյումրի գնացքի ուղևորների մի մասը իրենց ձեռքի տակ ունեին ախտահանիչ միջոցներ և կրում էին դիմակներ ու ձեռնոցներ, իսկ մյուսները,որոնք կարխարգելիչ միջոցների չէին դիմել, ասում էին` վարչապետն ասել է` խուճապի չմատնվեք, ամեն ինչ լավ է լինելու։
Երեւանից Գյումրի գնացքը հասավ երեք ժամում։
Գնացքի ուղեկցորդը նշեց, որ ուղևորների թիվը պակասել է․
«Ուղևորների հոսքը եռակի նվազել է։ Եթե սովորական օրերին ուղևորների մոտավոր թիվը կազմում էր 90-ից 100 հոգի, ապա երեկվա ու այսօրվա տվյալներով՝ ուղևորների թիվը հասնում է մոտ 40-ից 50-ի»:
Հիշեցնենք, որ մարտի 14-ից ՀԿԵ-ն կասեցրել է միջազգային ուղևորափոխադրումները։ Ընկերությունը վերադարձնում է տոմսերի արժեքները։ Իսկ ներհանրապետական էլեկտրագնացքը շարունակում է ամեն օր Երանից-Գյումրի և հակառակ ուղղությամբ 3 անգամ ուղևորափոխադրում իրականացնել։
Ի դեպ, ըստ պաշտոնական հաղորդագրության՝ Ընկերության գլխավոր տնօրենի հանձնարարությամբ մարտի 17-ից ՀԿԵ վարչական շենք, դեպոներ, գծային տնտեսություններ մուտք գործելուց դիստանցիոն ստուգվելու է բոլոր աշխատողների ջերմությունը: Բարձր ջերմություն ունեցողներն ուղղվելու են բժշկական հետազոտության:
