ՀՀ զինված ուժերն ի վիճակի են և՛ լռեցնել հակառակորդի կրակակետերը, և՛ վերահսկել իրավիճակը․ Նվեր Թորոսյան (տեսանյութ)
Աջակցիր «Ա1+»-ինՀԱՊԿ ինստիտուտի Հայաստանի ազգային ներկայացուցչության տնօրեն, Ռուսաստանի Դաշնության ազգային անվտանգության հիմնախնդիրների միջազգային ակադեմիայի գեներալ-մայոր, տեխնիկական գիտությունների թեկնածու Նվեր Թորոսյանն «Ա1+»-ի հետ զրույցում ՀԱՊԿ-ի աշխատանքը բավարար գնահատեց։ «Բավարար չափով իրականացնում է այն պարտականությունները, այն պայմանագրային պարտականությունները, որ ամրագրված է ՀԱՊԿ կանոնադրությունում»,- նշեց նա։
Նշենք, որ այսօր տեղի ունեցավ կլոր սեղան՝ Հավաքական անվտանգության պայմանագրի կազմակերպության դերը Կովկասի տարածաշրջանում անվտանգության ապահովման գործում թեմայով։
Մեր հարցին, թե ինչպե՞ս է գնահատում այն իրավիճակը, երբ Տավուշի ուղղությամբ կրակոցներ են հնչում, և ՀԱՊԿ-ը, կարծես թե, չի արձագանքում կամ հրապարակային որևէ արձագանքի ականատես չենք լինում, Թորոսյանը պատասխանեց, որ ՀՀ զինված ուժերն ի վիճակի են և՛ լռեցնել հակառակորդի կրակակետերը, և՛ վերահսկել իրավիճակը։
«Հակառակ դեպքում, երբ որ լինի անհրաժեշտություն և, ասենք, հայկական զինված ուժերը կամ հայկական քաղաքական վերնախավն անհրաժեշտություն գտնի, որ պետք է նաև ՀԱՊԿ անդամ պետությունների կամ ՀԱՊԿ քարտուղարության միջամտությունը, սահմանված կարգով իրենք պետք է դիմեն ՀԱՊԿ քարտուղարությանը, հրավիրեն անվտանգության խորհրդի նիստ, որի ընթացքում համապատասխան որոշում կամ հայտարարություն ընդունվի»,- պարզաբանեց ՀԱՊԿ ինստիտուտի տնօրենը։
Անդրադառնալով ինստիտուտի աշխատանքներին՝ Թորոսյանը նշեց, որ կառույցն իրականցնում է գիտահետազոտական վերլուծական աշխատանքներ։
ՀԱՊԿ անդամ պետությունների հետ Հայաստանի հարաբերությունները գործիչը բարիդրացիական է համարում։
Մանրամասները՝ տեսանյութում։
