«Նկարե՞լ եք, որ քաղաքապետը հռհռում էր ավագանու անդամի ելույթի ժամանակ»․ Էդմոն Մարուքյան
Աջակցիր «Ա1+»-ինԱԺ «Լուսավոր Հայաստան» խմբակցության ղեկավար Էդմոն Մարուքյանը խորհրդարանում լրագրողների հետ զրույցում Երևանի ավագանու «Լույս» խմբակցության ղեկավար Դավիթ Խաժակյանին հետ կանչելու վերաբերյալ ասաց, որ երեկ ավագանու նիստում Դավիթ Խաժակյանը բացահայտել է քաղաքապետարանում տեղի ունեցած պաշտոնեական կեղծիք, բայց ըստ պարոն Մարուքյանի՝ այն ԶԼՄ-ների կողմից չի լուսաբանվել։
«Եթե հանրային ընկալումն այն է, որ ավագանու անդամը պաշտոնեական կեղծիքը պետք է ծամած դնի դատախազության բերանը, ու դա չլուսաբանվի, որովհետև այն մարդկանց հետաքրքիր չէ, ուրեմն ավելի լավ է մենք չմասնակցենք»,- նշեց Էդմոն Մարուքյանը։
Ըստ նրա՝ մեդիան ծածկում է սկանդալային թեմաները, բայց ոչ մարդկանց իրական գործունեությունը։
«Եթե քաղաքացիները չեն տեսնում այդ աշխատանքը, արդյոք անհրաժե՞շտ է, որ մենք այդտեղ լինենք»,- նկատեց պարոն Մարուքյանը և հավելեց, որ Դավիթ Խաժակյանի աշխատանքը ջուրն է լցվում։
«Լուսավոր Հայաստան» կուսակցության ղեկավարը հրաժարվեց գնահատել «Լույս» խմբակցության մյուս 2 անդամների՝ Թեհմինա Վարդանյանի և Անի Խաչատրյանի գործունեությունը՝ նշելով, որ դա իրենց գնահատելու գործը չէ, և յուրաքանչյուր կուսակցություն պատասխանատու է իր անդամի համար։
Էդմոն Մարուքյանը նշեց, որ «Լուսավոր Հայաստան»-ի կառավարման խորհուրդը կորոշի՝ Դավիթ Խաժակյանը կշարունակի՞ մնալ ավագանիում, թե՞ հետ կկանչվի։ Պարոն Մարուքյանը կարծում է նաև, որ քաղաքապետ Հայկ Մարությանը ավագանու անդամների ելույթների ժամանակ «ձեռք է առնում նրանց, պրովոկացիայի է ենթարկում, իսկ մարդիկ էլ տրվում են դրան»։
«Բնականաբար պրովոկացիա անողը քաղաքապետն է, բայց կարծում եմ, որ դրան տրվողը պետք է իրեն հաշիվ տա։ Օրինակ՝ ԱԺ-ում էլ պարոն Միրզոյանը կարող է պրովոկացիայի ենթարկել ինձ, որ ես այնպիսի բան անեմ, որ իմ գործունեությունը այլևս անիմաստ լինել ԱԺ-ում, հիմա ես պե՞տք է պրովոկացիայի ենթարկվեմ։ Հետևաբար, կարևոր է նաև մեդիադաշտի գնահատականը սրան տրվի։ Օրինակ՝ երբ քաղաքապետը ծիծաղում էր ավագանու անդամի վրա, որևէ կամերա ցույց տվե՞ց այդ պահը, ոչ մի կամեռա ցույց չի տվել, մարդկանց ընկալման մեջ եղել է այն, որ ավագանու անդամը օդից ինչ-որ բան է անում։ Հարց եմ տալիս, նկարե՞լ եք, որ քաղաքապետը հռհռում էր ավագանու անդամի ելույթի ժամանակ»,- ասաց Էդմոն Մարուքյանը և հավելեց, որ այսօր թրենդ կա, որ թիրախավորվեն ավագանու անդամները, և սրբադասվեն իշխանության անդամները, ու լրատվամիջոցներն այդ թրենդի մեջ են։
