Որոշումը երկար տարիներ հասունացել էր․ վարչապետը՝ Ցեղասպանության ճանաչումն ընդունող բանաձեւի մասին (տեսանյութ)

Կառավարության նիստի սկզբում վարչապետ Նիկոլ Փաշինյանը անդրադարձավ ԱՄՆ Ներկայացուցիչների պալատի՝ Հայոց ցեղասպանությունը ճանաչող բանաձևի ընդունմանը՝ նշելով, որ դա շատ կարևոր իրադարձություն է Ցեղասպանության միջազգային ճանաչման գործում, որը կարող է նոր թափ հաղորդել այդ գործընթացին։

«Ուզում եմ իմ գնահատանքի խոսքը ասել ԱՄՆ-ում գործող հայկական կազմակերպություններին, որոնք տասնյակ տարիներ հետևողականորեն աշխատել են Ցեղասպանության ճանաչման համար՝ ԱՄՆ-ում և տարբեր երկրներում։ Այս որոշումը երկար տարիներ հասունացել էր, որովհետև ԱՄՆ-ի գրեթե բոլոր նահանգներն արդեն իսկ  նահանգային մակարդակում ճանաչել էին Հայոց ցեղասպանությունը, և սա դարձավ այդ գործընթացի գագաթնակետը։Ուզում եմ շնորհակալություն հայտնեմ նաև ԱՄՆ ներկայացուցիչների պալատի հայկական խմբի անդամներին և ներկայացուցիչների պալատի այն անդամներին, որոնք կողմ են քվեարկել Հայոց ցեղասպանությունը ճանաչող բանաձևին»,- ասաց վարչապետը։