Կարեւոր է, որ Գախարիայի այցի ժամանակ թարմացվի մեր միջպետական օրակարգը․ վրացագետ (տեսանյութ)
Աջակցիր «Ա1+»-ինՎրաստանի վարչապետ Գեորգի Գախարիայի մեկօրյա այցը Հայաստան ունի ավելի շատ ճանաչողական բնույթ, քանի որ նա որպես վարչապետ Հայաստան առաջին անգամ է այցելում, կարծում է վրացագետ Ջոնի Մելիքյանը։
«Նիկոլ Փաշինյանը վերջերս հայ-վրացական հարաբերությունների պարագայում հնչեցրեց ռազմավարական բառը, պետք է այդ գաղափարը զարգացնել, և մեր ռազմավարության մեջ պետք է հստակեցնենք, թե ինչպես ենք տեսնում մեր հարաբերությունները Վրաստանի հետ մոտ ապագայում։ Վրաստանի հետ ամենազարգացած ուղղվածությունը տնտեսական և առևտրային հարաբերություններն են, ենթակառուցվածքների մասով՝ տուրիզմի և էներգետիկայի ոլորտը։ Շատ կարևոր է, որ այս այցի ժամանակ թարմացվի մեր միջպետական օրակարգը։ Միջպետական հարաբերություններում, որ առկա են նաև տարածաշրջանային հարցերի քննարկումներն, պետք է Արցախի հարցի շուրջ մեր մոտեցումը ներկայացվի, քանի որ Բաքվում այդ հարցին, հավանաբար անդրադարձել են»,- նշեց նա։
Քաղաքագետ Նարեկ Մինասյանի կարծիքով՝ այն, որ Գեորգի Գախարիան առաջինը այցելել է Ադրբեջան, իր մեջ պարունակում է նաև քաղաքական ուղերձ, որն ադրբեջանական իշխանություններին և միջազգային հանրությանը հստակ արձանագրում էր Վրաստանի համար Ադրբեջանի ռազմավարական կարևորության մասին։ Սակայն, ըստ նրա, հատկանշական է նաև, որ Հայաստանի հետ Վրաստանը բավականին նախաձեռնողական քաղաքականություն է իրականացրել Վրաստանի նախկին վարչապետ Մամուկա Բախտաձեի կառավարման շրջանում, և ստեղծվել է բավականին դրական դինամիկա, ինչը պետք է պահպանել։
«Հայաստան և Վրաստան երկկողմ հարաբերություններում հատկանշական են ոչ ֆորմալ բնույթի հանդիպումները երկու երկրների վարչապետների միջև։ Ութ տարվա դադարից հետո տեղի ունեցավ հայ -վրացական առևտրատնտեսակաան միջակառավարական խորհրդի նիստը, որը բավական կարևոր էր։ Տեղի ունեցավ հայ -վրացական բիզնես համաժողով Հայաստանում, որը որոշակի խթան էր հաղորդում հայ-վրացական հարաբերություններին, և ստեղծվել էր ընդհանուր առմամբ դրական դինամիկա։ Պետք է ակնկալել Գեորգի Գախարիայի օրոք ևս հնարավոր կլինի պահպանել դրական դինամիկան և քննարկել նոր օրակարգային հարցեր»,- նշեց Նարեկ Մինասյանը։
