ՖԻԴԵ-ի դասակարգում. Լևոն Արոնյանը դուրս է մնացել առաջին տասնյակից

Շախմատի միջազգային ֆեդերացիան՝ ՖԻԴԵ-ն, հրապարակել է աշխարհի լավագույն շախմատիստների վարկանիշային նոր աղյուսակը:

Սեպտեմբերի 1-ի դրությամբ Հայաստանի հավաքականի ուժեղագույն շախմատիստ Լևոն Արոնյանը 2758 վարկանիշային միավորով զբաղեցնում է 14-րդ տեղը: Նախորդ ամսվա համեմատ նա նահանջել է վեց հորիզոնականով: Արագ շախմատում Լևոն Արոնյանը 13-րդն է, իսկ կայծակնայինում՝ 6-րդը:

Դասական շախմատի աղյուսակը շարունակում է վստահորեն գլխավորել աշխարհի չեմպիոն Մագնուս Կառլսենը: Երկրորդ հորիզոնականում փոխչեմպիոն Ֆաբիանո Կարուանան է, իսկ լավագույն եռյակը եզրափակում է չինացի Դին Լիժենը: Հայաստանի շախմատիստներից Գաբրիել Սարգսյանը 46-րդն է աղյուսակում (2690), Սերգեյ Մովսեսյանը` 98-րդը (2654), իսկ Հրանտ Մելքումյանը՝ 100-րդը (2653):

ՖԻԴԵ-ի վարկանիշային աղյուսակի առաջին տասնյակ.

1. Մագնուս Կառլսեն՝ 2876
2. Ֆաբիանո Կարուանա՝ 2812
3. Դին Լիժեն՝ 2811
4. Անիշ Գիրի՝ 2780
5. Յան Նեպոմնյաշչի՝ 2776
6. Մաքսիմ Վաշյե-Լագրավ՝ 2774
7. Շախրիյար Մամեդյարով՝ 2767
8. Ուեսլի Սո 2767
9. Վիշվանաթան Անանդ՝ 2765
10. Յու Յանժի՝ 2763