Աբովյան 22 ա հասցեի բնակիչները դեմ են հարակից տարածքում բազմահարկ շենքի կառուցմանը (տեսանյութ)
Աջակցիր «Ա1+»-ինԵրևանի Աբովյան 22 ա հասցեում քաղաքապետարանը շինթույլտվություն է տվել 12-հարկանի շենք կառուցելու համար:
Հարակից շենքերի բնակիչները բողոքի ակցիա են իրականացնում. նրանք դեմ են շինարարությանը:
Բնակիչ Տաճատ Եսայանի խոսքով՝ տարածքը, որտեղ կառուցվում է շենքը, չունի այն լանդշաֆթը, որ շինարարական աշխատանքների ժամանակ հարակից շեմքերի հիմքերը չխարխլվեն։
Ըստ նրա, մոտակա շենքում է բնակվում նաև Երևանի գլխավոր ճարտարապետ Արթուր Մեսչյանը։
«Իմ կողմից շատ հարգված Արթուր Մեսչյանն ի՞նչ է մտածել, որ համաձայնություն է տվել», - ասում է Եսայանը։
Այստեղ էր նաև Կենտրոն վարչական շրջանի ղեկավար Վիկտոր Մնացականյանը։ Հարցին, թե ի՞նչ է պատրաստվում անել քաղաքապետարանը, նա պատասխանեց, որ շինարարական աշխատանքները շարունակվելու են և, որ ամենը կատարվում է օրենքի համաձայն։
Շինարարական աշխատանքներով զբաղվող «ԳԼ» գրուպ տնօրեն, Օկտագոն Ս/Կ լիազոր Արմեն Մանուկյանը «Ա1+»-ի հետ զրույցում ասաց, որ աշխատանքները կատարվում են օրենքին համաձայն։
Նա նշեց, որ տարածքում նախկինում եղել են խարխլված տներ և դրանք գնել են սեփականատերերից, օրենքով սահմանված կարգով, իսկ բանակցությունները սկսել էին դեռևս 3-4 տարի առաջ։
Բնակիչները պատրաստվում են դիմել դատարան։
