Կոնվենցիայի վավերացման դեմ պայքարում են նախկին ռեժիմի ներկայացուցիչները․ քաղաքագետ (տեսանյութ)
Աջակցիր «Ա1+»-ին«Ստամբուլյան կոնվենցիայի վավերացման դեմ պայքարում են նախկին ռեժիմի մարդիկ։ Նախկին ռեժիմի ներկայացուցիչներն են դրան աստառ տալիս, մինչդեռ նրանք ազգային արժեքները բռնաբարած ուժն են։ Սա մեր հասարակությանը մի քանի դար հետ է տանում»,-այսօր լրագրողների հետ հանդիպմանը, պատասխանելով «Ա1+»- ի հարցին, ասաց քաղաքագետ Հայկ Մարտիրոսյանը։
Քաղաքագետը կոնվենցիան դիտարկում է մարդու իրավունքների տեսանկյունից։ Հայկ Մարտիրոսյանը կարծում է, որ հասարակությունը չպետք է ընկներ նախկին ռեժիմի թակարդը։
«Եթե որեւէ մեկը չի կարդում, չի խոսում կոնվենցիայի մասին, ուշադրությունը շեղվում է ավելի կարեւոր խնդիրներւց: Կարծում եմ` էստեղ իշխանությունը թողտվություն եւ ծուլություն է անում, պետք է իշխանությունը հասկանար՝ հասարակությունը ցանկանո՞ւմ է վավերացնել, թե՞ ոչ»։
ՀՀ գործող օրենսդրությունը շատ հարցերում կաղում է, հատկապես՝ մարդկանց, կենդանիների եւ բնության հարցերում։ Քաղաքագետը դեմ է սահմանադրական փոփոխություններին.
«Ես կողմ եմ ամբողջությամբ Սահմանադրությունը փոփոխելուն։ Պետք էր մերժել Սահմանադրությունը, կասեցնել այն եւ սկսել դրանից։ Երկու տարի առանց Սահմանադրության կարող էինք ապրել, ինչպես Մեծ Բրիտանիան է անում։ Վստահ եմ, որ այս իշխանությունը չունի այդքան կամք, խելք, ջանք թափելու մտադրություն՝ դա անելու»,-ասաց Հայկ Մարտիրոսյանը։
