«Երեխաներին նստեցնում են իրենց գիրկը, Ֆեյսբուքով լայվ անում ու մեքենա վարում» (տեսանյութ)
Աջակցիր «Ա1+»-ինՎերջին շրջանում տեղի ունեցած ողբերգական ավտովթարներից հետո քննադատություններ եղան, որ Ճանապարհային ոստիկանությունը իր գործառույթները լավ չի իրականացնում, վարորդները չեն տիրապետում երթևեկության կանոններին:
«Վարորդի ընկեր» հասարակական կազմակերպության համահիմնադիր Սերգեյ Ղահրամյանը նշում է, որ 2018թ․ երկրում տեղի ունեցած քաղաքական փոփոխություններից հետո պատահարների թիվը զգալիորեն ավելացել է:
«Շատ վարորդներ իրենց ազատություն տվեցին, որը ոստիկանության մեղմ քաղաքականության հետևանքով դարձավ շարունակական անպատժելիություն: Այն, ինչ կատարվում է փողոցներում, ամբողջ համակարգի թերի կամ սխալ աշխատանքի հետևանք է»,- ընդգծում է նա:
Որպեսզի պատահարներ չլինեն, Սերգեյ Ղահրամյանն առաջարկում է հատուկ հայեցողակարգ մշակել:
«Նախկինում՝ Սերժ Սարգսյանի ժամանակ, եղել է հայեցողակարգ, որն աշխատել է մինչև 2016 թվականը: Հատկանշական է, որ 2016-ին վերջին տասնամյակում մենք ունեցանք ամենաքիչ թվով զոհերը՝ 267-ը: Սակայն դա միայն հայեցողակարգի գործունեության արդյունքը չէր, այդ ժամանակ խստացումներ եղան՝ տեսախցիկներ ավելացրեցին»,- ասաց նա:
Հայեցողակարգ մշակելու համար մեծ ջանքեր պետք չեն, Սերգեյ Ղահրամյանի խոսքով՝ կարելի է օգտվել միջազգային փորձից։ Օրինակ՝ Շվեդիայում կա «Զրոյական մահացությունների հայեցողակարգ»: Թեև դրանով ճանապարհատրասնպորտային պատահարների քանակը զգալիորեն չի պակասում, բայց զոհերի թիվն է նվազում:
«Շվեդիայում մեքենաների քանակի ավելացմանը զուգընթաց՝ մահացությունները 16 տարիների (1997-2013) ընթացքում կրկնակիից ավել նվազել են: Նրանք նպատակակետեր են դրել, որպեսզի հասնեն զրոյական մահացություններով ճանապարհատրասնպորտային պատահարների»,- ընդգծեց նա:
Առաջարկի հետ, որ բոլորը պետք է քննությունները վերահանձնեն՝ վարորդական իրավունք ստանալու համար՝ այդկերպ խուսափելով ճանապարհատրանսպորտային վթարներից, նա համաձայն չէ: Կարծում է, որ եթե վարորդը թույլ է տալիս կանոնների խախտում, ապա դա չի վկայում նրա մասին, որ նա վարորդական իրավունքը գնել է:
«Դա կապված է վարորդի գիտակցության մակարդակով: Այսօր տեսնում ենք մարդկանց, որոնք երեխաներին նստեցնում են իրենց գիրկը և Ֆեյսբուքով լայվ են անում ու վարում: Ցավալին այն է, որ համապատասխան մարմինների կողմից որևէ արձագանք չկա», - ասաց նա՝ հավելելով․
«Դու վարորդական իրավունք ունե՞ս, թե՞ չէ, մեկ է, այդ մարդը խախտում է կանոնները, ինչքան էլ որ իսկապես քննությունով է ստացել: Ընդ որում՝ այդ խախտումները անողը տիրապետում է կանոններին, գիտակցաբար են այդ ամենը անում»: