Կոմիտասյան և թումանյանական շունչ՝ «Գառնի» պատմամշակութային արգելոց-թանգարանում (տեսանյութ)
Կոմիտասյան խմբերգային գոհարներ, Թումանյանի բանաստեղծություններով գրված մեներգեր, ռոմանսներ, խմբերգեր, հատվածներ «Անուշ» օպերայից կհնչեն Հայաստանի պետական կամերային երգչախմբի, Հայաստանի պետական կամերային նվագախմբի, «Հովեր» պետական կամերային երգչախմբի կատարմամբ հուլիսի 14-ին, երեկոյան «Գառնի» պատմամշակութային արգելոց-թանգարանում:
Կամերային երաժշտության ազգային կենտրոնի տնօրեն Նորայր Նազարյանի խոսքով, այս միջոցառումը Կոմիտասի և Հովհաննես Թումանյանի 150-ամյա հոբելյաններին նվիրված ամենամեծ ծրագրերից է: Համերգը կազմակերպել է ՀՀ կրթության, գիտության, մշակույթի և սպորտի նախարարությունը և Կամերային երաժշտության ազգային կենտրոնը։
Մուտքը տոմսերով է: 850 նստատեղ, արժեքը հինգ հազարից՝ տասնհինգ հազար դրամ:
«Կարծում եմ, որ նման միջոցառման համար, սա թանկ գին չէ»,- ասում է Նորայր Նազարյանը: Զբոսաշրջային գործակալություններին հետաքրքրել է միջոցառումը և կազմակերպիչներն ակնկալում են մեծ թվով զբոսաշրջիկների:
Տարին հոբելյանական է և Կամերային երաժշտության ազգային կենտրոնը դեռ տարբեր միջոցառումներ է կազմակերպելու: Մասնավորապես, սեպտեմբերի 29-ին Էջմիածնի նորակառույց վեհարանում ելույթ կունենան Հայաստանի պետական կամերային երգչախումբը և Հայաստանի պետական կամերային նվագախումբը՝ Ռոբերտ Մլքեյանի ղեկավարությամբ:
