Յուրի Դավթյան. երկու դարերն իրար միացրած դիրիժորը (տեսանյութ)
Աջակցիր «Ա1+»-ինՅուրի Դավթյան: Երկու դարերի դիրիժոր, ով 20-րդ դարը միացրեց 21-րդին։
Երաժշտությունը նրա համար ճակատագիր դարձավ այն օրը, երբ ռադիոյով լսեց Ավետ Գաբրիելյանի ջութակի նվագը:
Ուսանեց Չայկովսկու անվան երաժշտական դպրոցի ջութակի բաժնում, հետո ավարտեց Կոմիտասի անվան պետական կոնսերվատորիայի նվագախմբային դիրիժորության և թեորիայի բաժինները և այն, ինչ սովորեց ժամանակին իր ուսուցիչներ Կոնստանտին Սարաջևից, Միքայել Թավրիզյանից ու Գեորգի Տիգրանովից, մինչ օրս փոխանցում է իր սաներին:
Մեր դիրիժորների թվում թերևս չկա մեկը, որը անցած չլինի ՀՀ ժողովրդական արտիստ, դիրիժոր, պրոֆեսոր Յուրի Դավթյանի դպրոցը: Նրա որդին՝ ջութակար Հայկ Դավթյանը, ևս խմբավարական արվեստը ուսանել է հայրիկի մոտ:
Յուրի Դավթյանը ղեկավարել է Խորհրդային երկրի ամենահեղինակավոր նվագախմբերը՝ Մոսկվայի Մեծ թատրոնի նվագախումբը, Սանկտ Պետերբուրգի Մարինյան նվագախումբը, Սարատովի օպերայի և բալետի թատրոնի նվագախումբը։ Երկար տարիներ եղել է Երևանի Ալեքսանդր Սպենդիարյանի անվան օպերային թատրոնի գլխավոր դիրիժորը, ղեկավարել է ՀՀ հեռուստառադիոպետկոմի սիմֆոնիկ նվագախումբը և Հակոբ Պարոնյանի անվան երաժշտական կոմեդիայի պետական թատրոնի նվագախումբը, որի գլխավոր դիրիժորն է մինչ օրս:
Յուրի Դավթյանի սան Սերգեյ Սմբատյանը և Հայաստանի պետական սիմֆոնիկ նվագախումբը հոբելյանական համերգ էր կազմակերպել՝ նվիրված սիրելի մանկավարժի 90-ամյակին։