Մելինե (Մել) Դալուզյանը դանակահարվել է Ամստերդամում
Աջակցիր «Ա1+»-ինՀայաստանի հավաքականի նախկին անդամ ծանրորդուհի Մել (Մելինե) Դալուզյանը, ով բնակություն է հաստատել Հոլանդիայում, դանակահարվել է։ Այս մասին հայտնել է նրա ընկեր Արթուր Մինասյանը։
«Երկու դիմակավորված անձ, զինված դանակով, այսօր ցերեկն Ամստերդամի կենտրոնում փորձել են թալանել «Albert Heijn» սուպերմարկետի դրամարկղն՝ սպառնալով աշխատողին։ Իմ լավ ընկերը՝ Մելը, այդ պահին գնումներ էր կատարում, և, տեսնելով տեղի ունեցողը, աշխատողին օգնության է հասել, տապալել գողերին։
Ոստիկանությունը ժամանել է դեպքի վայր և ձերբակալել նրանց։ Ցավոք, մինչ ոստիկանությունը տեղ կհասներ, հանցագործներից մեկը հաջողացրել է դանակով խորը հարվածներ հասցնել Մելին՝ կրծքավանդակի ու մեջքի շրջանում։ Այնուամենայնիվ, Մելը, անգամ վիրավոր վիճակում, թույլ չի տվել նրանց փախչել։
Մելն այժմ հոսպիտալում է, վիճակը՝ կայուն։ Կյանքին, բարեբախտաբար, վտանգ չի սպառնում։ Հոլանդական ԶԼՄ-ները հերոսական են որակում նրա արարքը։
Հ.Գ. Մել Դալուզյանը ծանրամարտի Եվրոպայի կրկնակի չեմպիոն ու ռեկորդակիր, աշխարհի կրկնակի բրոնզե մեդալակիր է, որ ներկայացրել է Հայաստանը։ Տրանսգենդեր աթլետը քաղաքական ապաստան է ստացել և երեք տարի է՝ բնակվում է Նիդեռլանդներում»։
