Բացել լրահոսը Փակել լրահոսը
A A
Պաշտոնական

Համագործակցությունն ամրապնդվել է հուշագրով

ՀՀ ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի հեռուստատեսության, ռադիոյի, մամուլի եւ տեղեկատվության ոլորտներն ընդգրկող ենթահանձնաժողովի ղեկավար Վահագն Թեւոսյանը եւ «ԻՖԿԱ. Հայաստանի անկախ կինոգործիչների համայնք» հասարակական կազմակերպության նախագահ Սաթիկ Ստեփանյանը մայիսի 15-ին Համագործակցության հուշագիր են ստորագրել:

Կազմակերպությունը, որի կազմում կինոարտադրությամբ զբաղվող տարբեր ընկերությունների անդամներ են, գործունեություն է ծավալում շուրջ երկու տարի, զբաղվում է ոլորտի խնդիրներով, նաեւ՝ շնորհալի երիտասարդների առաջխաղացման համար տարբեր ծրագրերի իրականացմամբ:

Վահագն Թեւոսյանի գնահատմամբ՝ վերջին տարիներին Հայաստանում կինոարտադրության զարգացումը, պայմանավորված տարբեր հանգամանքներով, կաղում է եւ հուշագրի ստորագրումն ու համագործակցության նման հարթակի ձեւավորումը կարող են բարերար ազդեցություն ունենալ բնագավառի վրա: Նա ընդգծել է, որ հանձնաժողովը բաց եւ պատրաստակամ է ոլորտային տարաբնույթ խնդիրների քննարկման համար:

Խոսելով հուշագրի նպատակների մասին՝ Սաթիկ Ստեփանյանը կարծիք է հայտնել, որ խորհրդարանական հանձնաժողովի հետ համագործակցությունը կարող է նպաստել ոլորտում առկա խնդիրների լուծմանն ու առողջ մթնոլորտի ձեւավորմանը:

Հանդիպման ընթացքում անդրադարձ է եղել մշակման փուլում գտնվող «Կինոյի մասին» ՀՀ օրենքի նախագծին, որի կապակցությամբ, ինչպես տեղեկացրել է Սաթիկ Ստեփանյանը, այժմ խորհրդատվություն են իրականացնում եվրոպացի մասնագետներ: